Jergilikti joldardy kútip ustaý men paıdalanýdy jetildirýde biryńǵaı operator bolýy kerek - senator

ASTANA. QazAqparat – Senattyń Ekonomıkalyq saıasat, ınnovatsııalyq damý jáne kásipkerlik komıtetiniń hatshysy Serik Shaıdarov óńirlerdi damytý jónindegi Parlamenttik tyńdaýda jergilikti mańyzdaǵy joldardy kútip ustaıtyn biryńǵaı operator qurýdy usyndy, dep habarlaıdy QazAqparat tilshisi.

«Jahandyq básekege qabilettilik ındeksiniń málimeti boıynsha, Qazaqstan joldardy damytý ahýaly boıynsha álem elderiniń reıtınginde 93-oryndy ıelenip, Ázerbaıjan, Tájikstan, Grýzııa jáne Armenııadan da artta qaldy. Sondyqtan, biz jergilikti joldardyń barlyq ýchaskelerin dıagnostıkalap, pasporttaýdy usynamyz. Bul qazirgi jaǵdaıdy anyqtap, jóndeý jumystaryn qarjylandyrýdyń ońtaıly tetigin ázirleý úshin mańyzdy», - dedi senator.

Onyń aıtýynsha, jolǵa baılanysty jobalardy qarjylandyrý óńirlerdiń naqty qajettilikterinen týyndaýy kerek.

«Jergilikti joldardy kútip ustaý jáne paıdalaný baǵytyndaǵy jumysty jetildirý úshin biz jol-paıdalaný mekemeleriniń áleýetin kúsheıte otyryp, biryńǵaı operator qurý máselesin qaraýdy usynamyz. Olardyń jumysyn jergilikti atqarýshy organdar baqylap, qabyldap alyp otyrýy kerek», - dedi Serik Shaıdarov.