Jergilikti jerde bıznesti tekseretinder oıyna kelgendi istep júr - Bas prokýratýra

ASTANA. QazAqparat - QR Bas prokýratýranyń málimetine sáıkes, jergilikti jerde kásipkerlerdi tekseretin organdar oılaryna kelgendi istep, oryndaýǵa múldem kelmeıtin talaptardy qoıyp otyrady, dep xabarlaıdy QazAqparat tilshisi.

«Máselen, ótken jyly Shaxtınsk qalasynyń kásipkerler quqyqtaryn qorǵaý basqarmasy bir bıznesmennen sáıkestik týraly kýálikti talap etip, saýda-sattyqty júrgizýge tyıym saldy. Kásipkerde ondaı qujat bolǵan da joq. Sonda tekserýshiler ondaı qujattyń joqtyǵyn, ıaǵnı ol talaptyń oryndalmaıtynyn aldyn ala bilip, kásipkerge 212 000 teńge kóleminde aıyppul saldy. Negizi, tekseris kezinde jańaǵy kýálik suralmaýy tıis», - deıdi Bas prokýratýranyń departament basshysy Marat Seksembaev.

Bir ǵana Qaraǵandy oblysynda tekserýshiler 203 kásipkerdiń tıisti talapty oryndaı almaıtynyn aldyn ala bilgen.

Onyń aıtýynsha, osy ispetti "zań buzýshylyqtarǵa" qatysty sot sheshimderi de árqıly bolyp keledi. Bir jerde qatań sharalar qoldanylsa, ekinshi jerde jaýapkershilikten bosatyp jatady. Máselen, Aqtóbe qalalyq soty sáıkestik kýáligin kórsetpegeni úshin bir kásipkerge 100 AEK kóleminde aıyppul salǵan. Al týra osy syndy jaǵdaı boıynsha Batys Qazaqstan oblysy Shyńǵyrlaý aýdandyq soty isti toqtatty.

«Sondyqtan, biz Joǵarǵy sotqa shyǵyp, ondaı isterge taldaý jasaıtyn bolamyz. Sonyń negizinde tıisti usynystar jasalady», - dep atap kórsetti Seksembaev kásipkerler quqyǵyn qorǵaý jáne sybaılas jemqorlyqqa qarsy is-qımyl keńesiniń búgingi otyrysynda.

Otyrys barysynda Bas prokýratýra aqylǵa syımaıtyn keıbir tekseristerdi jarııalady.