Jergilikti sheneýnikter sýbsıdııanyń jartysynan kóbin ustap qalady - kásipker
«Biz ósimdik sharýashylyǵymen aınalysamyz. Osyǵan baılanysty memleket tarapynan qoldaý jasalady. Máselen, jańa tehnıkany satyp alýǵa sýbsıdııa beriledi. Byltyr onyń kólemi tehnıka baǵasynyń 25 protsentin qurady. Mine, dál osy qarajatty alǵanda biz sheneýnikterdiń bylyǵyna tap boldyq. Olar 25 protsentti sanaǵanda esep-qısapty óz betinshe júrgizdi. Bizdiń dálelderimizge qulaq asqan da joq. Osylaısha, sýbsıdııanyń 25 protsentin emes, 9 protsentin ǵana berip turdy. Sonda memleket qyrýar qarjyny bólip berdi. Al jergilikti sheneýnikter ony ustap qaldy», - deıdi M.Ekajev.
Kásipker biraz jerge baryp, hat jazdy. QR Aýyl sharýashylyǵy mınıstrligine de aryzdandy. Ol jaqta kásipkerdiń barlyq ýájderin qoldady. Alaıda jergilikti sheneýnikter oǵan: «Mınıstrlik bizge buıryq emes. Biz ákimdikke ǵana baǵynamyz. Esep-qısabymyz durys», - dep taǵy da shyǵaryp saldy. Sodan Magomed Ekajev QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń kómegine júgindi.
«Shynymdy aıtsam, bas kezinde bizdiń máselemiz sheshiledi dep oılaǵan joqpyn. Sebebi buǵan deıin biraz jerdiń tabaldyryǵyn tozdyrdyq. Biraq agenttik mamandary birden álgi sheneýnikterge shyǵyp, arnaıy otyrys ótkizdi. Sóıtip, bir aıǵa tolmaı, bizdiń máselemiz sheshildi, barlyq sýbsıdııamyzdy tólep berdi. Buǵan deıin jergilikti sheneýnikter 14 mıllıon teńgeniń 5 mıllıonyn ǵana bergen edi. Agenttiktiń arqasynda biz qalǵan 9 mıllıonymyzdy aldyq. Barlyq memlekettik organdarda bızneske degen kózqaras osyndaı bolsa ǵoı. Bir qyzyǵy, jańaǵy sheneýnikter bizge «barlyq kásipkerler bergenine rıza, al sizder oǵan da razy emessizder» deıdi. Zań boıynsha beriletin sýbsıdııamyzdyń biraz bóligin ustap qalsa, oǵan biz qalaı razy bolamyz? Basqalar amalsyz sheneýnikterdiń aıtqanyna kónip otyr», - dep atap kórsetti M.Ekajev.
Aıta ketken jón, ótken jyly QR Memlekettik qyzmet isteri jáne sybaılas jemqorlyqqa qarsy is-qımyl agenttigi, QR Syrtqy ister mınıstrligi, sondaı-aq, QR Indýstrııa jáne ınfraqurylymdyq damý mınıstrligi «Protecting business and investments» jobasyn qolǵa alǵan bolatyn. Negizgi maqsat - bıznes pen ınvestıtsııalardy jemqorlyq áreketterden keshendi túrde qorǵaý. Osyǵan oraı, arnaıy jobalyq keńse quryldy. Oǵan kiretin mamandar bıznesmender men ınvestorlardy sanalýan jasandy bıýrokratııalyq kedergilerden qorǵaıdy. Búginde keńse 282 bıznes-jobany júrgizip keledi. Sonyń ishinde sheteldik kapıtal da bar. Osy ýaqytqa deıin kásipkerlerge qoldan kedergi jasaǵan birneshe sheneýnik jazaǵa tartyldy.
Aıta keteıik, QR Memlekettik qyzmet isteri jáne sybaılas jemqorlyqqa qarsy is-qımyl agenttigi agroónerkásip salasyndaǵy jemqorlyqty baqylaý jónindegi arnaıy topty qurǵan bolatyn. Onyń quramynda buryn QR Aýyl sharýashylyǵy vıtse-mınıstri qyzmetin atqarǵan Tóleýtaı Raqymbekov bar. Mamannyń aıtýynsha, búginde sýbsıdııa taratqanda sybaılas jemqorlyq áreketteri jıi bolyp jatady.
«Sońǵy jyldary aýyl sharýashylyǵyna qyrýar qarjy bólinip keledi. Bir sýbsıdııanyń ózi on bes jylda 100 esege ósti. Buryn 3,5 mıllıard teńge bolsa, qazir sýbsıdııa kólemi 300 mıllıard teńgeden asady. Ókinishke qaraı, jemqorlyq áreketteri de az emes. Máselen, oblystyq jáne aýdandyq deńgeıde sýbsıdııa taratqanda sybaılas jemqorlyq jıi bolyp jatady. Ondaı faktiler barshylyq. Nesıe stavkasyn sýbsıdııalaýdy alaıyqshy, 4 myńnan astam sharýa qujat jınap júgiredi. Olardyń barlyǵy aýdanda, al jergilikti jerde bıýrokratııa ýshyǵyp tur. Odan da aýyldyq nesıe berý seriktesterine bere salǵan jeńil emes pe? 180 seriktestik qana, olar ózderi taratyp bere salady. Sharýalardy qujat jınatyp, júgirtkenshe sýbsıdııany osynda, Astanada bir ret bere salǵan durys», - deıdi T.Raqymbekov.