Jergilikti ózin-ózi basqarý organdary úshin satyp alý tártibi jeńildetiledi - Prezıdent

NUR-SULTAN. QazAqparat – Jergilikti ózin-ózi basqarý organdary úshin satyp alýlarda bıýrokratııalyq kedergilerdi joıýǵa ekpin qoıylady. Bul týraly Memleket basshysy Qasym-Jomart Toqaev Qazaqstan halqyna Joldaýy barysynda málim etti, dep habarlaıdy QazAqparat tilshisi.

«Jergilikti ózin-ózi basqarý organdary úshin memlekettik satyp alý tártibin jeńildetý, bıýrokratııa men formalızmdi joıý mańyzdy qadam bolmaq. Úkimetke Prezıdent Ákimshiligimen birlesip, berilgen tapsyrmalardy júzege asyrý tásilderin pysyqtaýdy jáne sonyń bárin «Ózin-ózi basqarý týraly» zańdy ázirleý kezinde eskerýdi tapsyramyn», - dedi Memleket basshysy.

Sonymen qatar bul saladaǵy halyqaralyq bazalyq qujat bolyp sanalatyn Jergilikti ózin-ózi basqarýdyń Eýropalyq hartııasyn Qazaqstannyń ratıfıkatsııalaýy máselesin pysyqtaý qajettigi aıtyldy.

«Bul sharalardyń barlyǵy óz aınalasyndaǵylardy jurtshylyqty tolǵandyrǵan problemalardy tıimdi sheshý isine jumyldyra alatyn, naǵyz bedeldi, jaýapkershiligi mol jergilikti kóshbasshylardyń shyǵýyna septigin tıgizetin bolady. Jergilikti ózin-ózi basqarý júıesiniń nyǵaıa túsýi óńirlerdi damytý, masyldyq kóńil-kúıdi tómendetý jáne elimizdegi demokratııalyq ózgeristerdi ornyqtyrý úshin jańa múmkindikterge jol ashady», - dedi Prezıdent.

Buǵan deıin habarlanǵandaı, Prezıdent naqty quzyretterdi ortalyqtan óńirlerge berý qadamdary jalǵasatynyn aıtty.

Munymen qosa, jergilikti ózin-ózi basqarý organdaryn tikeleı qarjylandyrý tetigin engizý kerek ekeni atap ótildi.