Jergilikti máslıhattardyń 30 depýtaty saılandy

ASTANA. QazAqparat - 30 qazanda óńirlik máslıhattardyń shyǵyp qalǵan 30 depýtatyn saılaý ótti. Bul týraly búgin QR Ortalyq saılaý komıssııasynyń múshesi Lázzat Súleımen málim etti, dep habarlaıdy QazAqparat.

Caılaý zańnamasyna sáıkes 30 qazanda respýblıkanyń 10 óńirinde, 30 saılaý okrýginde máslıhattardyń shyǵyp qalǵan depýtattarynyń ornyna saılaý boldy. Saılaýdy uıymdastyrý men ótkizýge 10 oblystyq, 6 qalalyq, 17 aýdandyq, 30 okrýgtik, 160 ýchaskelik saılaý komıssııalary tartyldy. Saılaý naýqany barysynda barlyǵy 101 kandıdat usynyldy. Olardyń ishinde 16-sy oblystyq máslıhatqa, 35-i qalalyq máslıhatqa jáne 50-i aýdandyq máslıhatqa daýysqa tústi. 31 úmitkerdi saıası partııalar, al 70 azamat ózin-ózi usyndy», - dedi ol.

Komıssııa múshesiniń aıtýynsha, okrýgtik saılaý komıssııalary máslıhattar depýtattyǵyna kandıdattar retinde 96 adamdy tirkep, saılaý bıýlletenderine olardyń  tegi engizildi. Ortasha básekelestik bir depýtattyq mandatqa shamamen 3 úmitkerdi qurady.

«Daýys berý 2016 jylǵy 30 qazan kúni 160 saılaý ýchaskesinde ótti. Saılaýshylardyń kelýi 79,6 paıyzdy qurady. Daýys berý qorytyndylaryna sáıkes oblystyq máslıhattyń 4 depýtaty, qalalyq máslıhattyń 10 depýtaty jáne aýdandyq máslıhattyń 16 depýtaty saılandy. Daýys berý barysy men daýystardy sanaý rásimin baıqaýdy kandıdattardyń senim bildirgen adamdary, saıası partııalardyń, qoǵamdyq birlestikterdiń jáne BAQ ókilderi - barlyǵy 396 adam júzege asyrdy. Máslıhattardyń saılanǵan depýtattarynyń quramynda 29  er adam jáne 1 áıel adam bar», - dedi Súleımen.

Onyń sózine qaraǵanda, máslıhattarǵa saılanǵan depýtattarynyń ortasha jasy  45 jas. Eń jas depýtat 24-te.  Ol Batys Qazaqstan oblysy Syrym aýdanynyń № 6 saılaý okrýginde saılandy. Eń eresek depýtat 63-te. Ol  Qaraǵandy qalasy máslıhatynyń № 30 saılaý okrýginde saılandy.

«Saılanǵan depýtattardyń 96,67 paıyzy joǵary bilimdi, 3,33 paıyzynyń arnaıy orta bilimi bar. 40 paıyzy memlekettik mekemelerde, uıymdar men kásiporyndarda, 53,3 paıyzy kommertsııalyq qurylymdarda qyzmet atqarady, 6,7 paıyzy  saıası partııalar men úkimettik emes uıymdardyń qyzmetkerleri. Saılaý naýqany saılaý zańnamasy normalarynyń talaptaryna sáıkes ótti. Ortsaılaýkomǵa shaǵymdar men ótinishter túsken joq», - dedi komısııa múshesi.