Jergilikti mańyzy bar joldardy jańartý kórsetkishi qaı deńgeıde
«Óńirlerdiń ortalyqpen ishki kóliktik baılanysyn qamtamasyz etý maqsatynda jergilikti avtojoldar jelisin damytý jalǵasyp keledi. Oblystyq jáne aýdandyq mańyzy bar avtojoldardy, sondaı-aq kóshe-jol jelisin damytý, jóndeý jáne kútip ustaý jergilikti atqarýshy organdardyń qaraýynda bolady. Búgingi tańda jergilikti mańyzy bar avtojoldardyń jalpy uzyndyǵy – 71 myń shaqyrym. Qazirgi tańda joldardyń 80 paıyzy (56 myń shaqyrym) normatıvtik jaǵdaıǵa saı keledi», - dedi Q. Óskenbaev.
Memleket basshysynyń tapsyrmasyna sáıkes, jergilikti atqarýshy organdardyń aldynda negizgi strategııalyq mindet tur. Atap aıtqanda, 2025 jylǵa qaraı jergilikti mańyzy bar joldardyń 95 paıyzyn normatıvtik jaǵdaıǵa keltirý qajet.
«Qoıylǵan mindetterdi iske asyrý maqsatynda jergilikti atqarýshy organdar 2025 jylǵa deıin keminde 14 myń shaqyrym jolda qurylys pen jóndeýdi qamtamasyz etýi tıis. 2022 jyldyń qorytyndysy boıynsha jergilikti jeli avtojoldarynyń 85 paıyzyna deıin normatıvtik jaǵdaıǵa sáıkes jetkizý josparlanyp otyr. Bıýdjet kodeksine sáıkes, mınıstrlik jergilikti jeli joldaryn damytýǵa transfertterdi tepe-teń negizde bóledi», - dedi vedomstvo basshysy.
Onyń sózine qaraǵanda, 2022 jyly jergilikti mańyzy bar joldardy salýǵa jáne rekonstrýktsııalaýǵa 372,3 mlrd teńge bólindi. Bólingen qarajat esebinen 4,6 myń shaqyrym jolda qurylys jumystary júrgizilip jatyr. Qurylys jumystarynyń shamamen 70 paıyzy oryndaldy.
«Jalpy, jergilikti jeliniń jol jobalaryn qarjylandyrý tepe-teń negizde, ıaǵnı respýblıkalyq bıýdjetten 50 paıyzdyq, jergilikti bıýdjetten 50 paıyzdyq negizde júzege asyrylady», - dedi mınıstr.
Buǵan deıin habarlaǵanymyzdaı, 2025 jyly respýblıkalyq jeli boıynsha normatıvtik jaǵdaıdaǵy joldardyń úlesi 100 paıyzǵa deıin jetkizilmek.