Jergilikti mańyzy bar máseleler neǵurlym jedel sheshiledi - mınıstrlik

NUR-SULTAN. QazAqparat – QR Ulttyq ekonomıka mınıstrligi aýdandyq, qalalyq jáne aýyldyq bılik deńgeıleriniń derbestigin keńeıtýge qatysty qujattyń qabyldanýyna oraı jańa qadamdarǵa túsinik berdi, dep habarlaıdy QazAqparat.

Aıta keteıik, bıyl 30 maýsymda «Qazaqstan Respýblıkasynyń keıbir zańnamalyq aktilerine aýdandyq, qalalyq jáne aýyldyq bılik deńgeıleriniń derbestigi men jaýapkershiligin keńeıtý máseleleri boıynsha ózgerister men tolyqtyrýlar engizý týraly» Zańyna qol qoıyldy.

«Zań birqatar normatıvtik quqyqtyq aktilerge aýdandyq mańyzy bar qalalardyń, aýyldardyń, kentter men aýyldyq okrýgterdiń kiris bazasyn keńeıtý, bıýdjettik rásimderdi ońaılatý, ákimshilik-aýmaqtyq birlikterge qoıylatyn talaptardy jetildirý, derbestikti keńeıtý jáne jergilikti ókildi ári atqarýshy organdardyń jaýapkershiligin kúsheıtýge qatysty ózgerister men tolyqtyrýlar engizýdi kózdeıdi», - delingen mınıstrlik málimetinde.

Jergilikti ózin-ózi basqarý bıýdjetiniń kiris kózderin ulǵaıtý úshin bıýdjettiń IV deńgeıine salyqtar men tólemderdiń qosymsha tórt túri beriletin bolady. Budan basqa, bıýdjettik rásimder jeńildetiledi. Atap aıtqanda, aýyldyq okrýg ákimi apparaty úshin bıýdjetke jıyrma paıyzdan aspaıtyn kólemde túzetý engiziledi. Túzetý jergilikti qoǵamdastyq jınalysynyń kelisimi boıynsha júrgiziledi.

Bıýdjet kodeksine qarjy jyly ishinde aýdan men aýyldyq okrýg bıýdjetteri arasyndaǵy jalpy sıpattaǵy transfertter kóleminiń ózgerýine jol bermeıtin naqtylaýshy norma engiziledi.

«Taǵy bir túzetý ákimshilik-aýmaqtyq birlikter sanatyn ózgertý tártibin anyqtaıdy. Qala mártebesiniń ózgerýi sáıkes kelmegen jaǵdaıda bes jyl ishinde, aýyldar – úsh jyl ishinde júzege asyrylatyn bolady.

Zańda máslıhat pen olardyń depýtattarynyń mártebesin arttyrý, atap aıtqanda, máslıhat sessııasynyń tóraǵasy laýazymyn taratý jáne onyń ókilettigin máslıhat hatshysyna berý kózdelgen», - dep atpalyp ótken habarlamady.

Qujat Memleket basshysynyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Qazaqstan halqyna Joldaýyn iske asyrý maqsatynda ázirlendi.

Bul turǵyda qabyldanǵan sharalar óńirlerdiń derbestik jáne jaýapkershilik deńgeıin arttyrýǵa ári jergilikti mańyzy bar máselelerdi neǵurlym jedel sheshý úshin bıýdjettik rásimderdi aıtarlyqtaı jeńildetýge múmkindik beredi.