Jergilikti qamtýdy damytýdyń ınvestıtsııalar qoryna qansha qarajat tústi

NUR-SULTAN. QazAqparat – «Shevron» kompanııasy jergilikti qamtý úlesin damytýǵa 248,5 mln dollar ınvestıtsııa bólmekshi. Úkimet otyrysynda QR Energetıka mınıstri Maǵzum Myrzaǵalıev osyndaı málimet berdi, dep habarlaıdy QazAqparat tilshisi.

«Bıyl Jergilikti qamtýdy damytýdyń tikeleı ınvestıtsııalar qory quryldy. «Shevron» kompanııasy jergilikti qamtý úlesin damytýǵa 248,5 mln dollar ınvestıtsııa bóledi. Bul kompanııanyń Qazaqstan aldyndaǵy qaıta ınvestıtsııalaý mindettemeleri sheńberinde júzege asady.

Investıtsııalar tehnologııa men IT, bazalyq taýarlar óndirisi jáne munaı-gaz sektoryna arnalǵan jabdyqtardyń jekelegen túrlerin qurastyrý jáne qorshaǵan ortany qorǵaý salalaryna bólinedi», - dedi Maǵzum Myrzaǵalıev.

Onyń aıtýnysha, búginde Qor «Astana» halyqaralyq qarjy ortalyǵynyń alańynda tirkelgen. Energetıka mınıstri otandyq taýar óndirýshiler Qazaqstan naryǵyn qandaı ónimdermen tolyq qamtyp otyrǵanyn da atady.Olar:

- sendvıch panelderi, metall konstrýktsııalary, temirbeton jáne armatýra sııaqty qurylys-montaj materıaldary;

- qubyr materıaldary;

- ydystar men jylý almastyrǵysh sııaqty mehanıkalyq jabdyqtar;

- transformator, elektr qalqandary, sııaqty elektr materıaldary;

- kabel, beınebaqylaý júıesi sııaqty telekommýnıkatsııa materıaldary;

- janar-jaǵarmaı materıaldary.

Muny Maǵzum Myrzaǵalıev «otandyq taýar óndirisi damýynyń oń qarqyny» dep baǵalaıtynyn jetkizdi.