Jergilikti bıýdjetterdiń kiristerin ulǵaıtý jónindegi qadamdar jetkiliksiz – senator

NUR-SULTAN. QazAqparat - Senator Sergeı Karplıýk Premer-Mınıstr Álıhan Smaıylovtyń atyna depýtattyq saýal joldady. Ol óziniń saýalynda Memleket basshysy bıýdjetaralyq qatynastardy zańnamalyq deńgeıde túbegeıli reformalaýdy tapsyrǵanyn atap ótti, dep habarlaıdy QazAqparat tilshisi.

Senatordyń pikirinshe, qarjylyq derbestikti keńeıtý, óńirlik ekonomıkany damytýǵa yntalandyrý jáne jergilikti bıýdjetterdiń kiristerin ulǵaıtý úshin qabyldanyp jatqan sharalar jetkiliksiz bolyp otyr.

«Jalpy sıpatta bólinetin transfertter men nysanaly transfertter turǵyndarǵa memleket kepildik bergen birdeı qyzmetterdi, ásirese ınfraqurylymdyq qyzmetterdi usynýdaǵy óńirler arasyndaǵy alshaqtyqty kóp ózgerte almaıdy. Áleýmettik jaısyzdyq pen shıelenistiń alǵysharttaryna ákeletin sáıkessizdikterdi eskere kelgende, jalpy sıpattaǵy transfertterdi qalyptastyrýdyń tıimdiligi jóninde másele týyndaıdy», - dep atap ótti depýtat Sergeı Karplıýk óz saýalynda.

Depýtat shyǵyndar boljamyn anyqtaý ádisindegi máselelerge de toqtaldy. Onyń aıtýynsha, keıbir baǵyttar boıynsha qarjylandyrýdyń óse túskeni baıqalady, al basqa baǵyttar boıynsha - kerisinshe, qarjylandyrýdyń jetispeýshiligi turaqty sıpatqa aınalyp bara jatyr.

Senator osyǵan baılanysty jergilikti bıýdjet kiristerin boljaý ádistemesin jaqsartý, nysanaly transfertterdi bólý protsesin qaıta qaraý, jalpy sıpattaǵy transfertterdi qaraý jáne qalyptastyrý kezinde jergilikti ári ortalyq atqarýshy organdardyń jaýapkershiligin belgileý men basqa da máselelerdi Úkimet qaraýy kerek ekenin aıtty.