Jergilikti bıýdjette qarajat joq - Almaty ákimi Artsport baǵdarlamasy týraly

ALMATY. QazAqparat – 1 qyrkúıekten bastap Artsport baǵdarlamasyn qarjylandyrý toqtatylady. Bul týraly Erbolat Dosaev Naýryzbaı aýdany turǵyndarymen kezdesý barysynda aıtty, dep habarlaıdy QazAqparat tilshisi.

Naýryzbaı aýdany turǵyndarynyń biri kezdesý kezinde ákimge balalarynyń Artsport baǵdarlamasy boıynsha sport sektsııalaryna tegin baratynyn jetkizip, suraq qoıdy.

«Bizge osy baǵdarlama jaqynda jabylatyny aıtyldy. Endi Artsport jaıy ne bolmaq?» - dep surady ol.

Qala ákimi Erbolat Dosaev qyzmet kórsetýshilerge 1 qyrkúıekten bastap qarjylandyrý toqtatylatyny týraly aldyn ala habarlanǵanyn málimdedi.

«Artsport baǵdarlamasyn qarjylandyrýǵa jergilikti bıýdjette aqsha joq. Biz qyzmet qórsetýshiler men ata-analarǵa adal boldyq. Birinshiden, qarjylandyrý máselesin sheshý kerek, oǵan bıýdjetten qarajat qarastyrylmaǵan. Baǵdarlama óte mańyzdy kelisemin jáne ol bizdiń qalaǵa qajet», - dedi ol.

Aıtýynsha, qazirgi tańda halyqtyń áleýmettik osal toptary sanatyndaǵy balalarǵa arnalǵan sport sektsııalarynyń qalalyq baǵdarlamasyn ázirleý múmkindigi qarastyrylyp jatyr.

Eske salsaq, buǵan deıin astanada Artsport baǵdarlamasy aıasynda vaýcherler úlestiriletini týraly WhatsApp arqyly jalǵan aqparat taraǵan edi.