Jergilikti bılik múgedekter máselesine nemquraıly qaraıdy - Bas prokýratýra

ASTANA. 7 qarasha. QazAqparat - Qazirgi kezde múgedekterdiń turǵyn úı máselesi durys sheshilmeıdi. Al jergilikti bılik oǵan nemquraıly qarap otyrady. Búgin múgedekterdiń quqyqtaryn qorǵaý máselelerine arnalǵan alqa májilisinde QR Bas prokýrory Ashat Daýylbaev osylaı aıtty.

«Búginde múgedekterdiń adam sengisiz jaǵdaılarda kún kórip jatqanyn jıi kóremiz. Oǵan qoǵam ábden úırengen sııaqty. Al jergilikti bılik múgedekterdiń turǵyn úı máselesine nemquraıly qaraıdy. Shynyn aıtý kerek, múgedek jandardyń turǵyn úıge degen quqyqtary jıi buzylady. Bizge qaraǵanda, olardyń ózdigimen baspana alýǵa múmkindigi az ekendigin túsiný qıyn emes qoı», - deıdi A.Daýylbaev.

Bas prokýror atap kórsetkendeı, Qostanaı qalasynda eki jyldyń ishinde tek bir ǵana múgedekke úı berildi. Al ákimdik kezeginde turǵan ondaı azamattardyń sany 908 adamǵa jetken. Sol sııaqty múmkindigi shekteýli azamattardy jumysqa alý kórsetkishi de tómen bolyp tur. Búginde respýblıka boıynsha eńbekke qaýqary bar 425 myń múgedektiń tek 15 paıyzy ǵana jumyspen qamtylǵan.