Jergilikti atqarýshy organdarǵa taǵy bir jaýapkershilik júkteledi
«Jańa ázirlenip jatqan densaýlyq júıesi týraly kodeks aıasynda birinshi kezekte halyqqa ambýlatorııalyq-emhanalyq kómekti tıimdi uıymdastyrýdy qamtamasyz etý úshin jergilikti atqarýshy organdardyń jaýapkershiligi kúsheıtiletin bolady. Jalpy sıpattaǵy transfertter aıasynda jergilikti atqarýshy organdarǵa alǵashqy medıtsınalyq kómektiń shaǵyn ortalyqtaryn qurý jáne bir dárigerge shaqqanda bekitilgen halyqtyń sanyn 1700-ge deıingi normatıvke jetkizý boıynsha mindetter usynylady. Bul rette osy qarajat memlekettik medıtsınalyq nysandar salýǵa, sondaı-aq memlekettik-jekemenshik áriptestik jobasyn oryndaýǵa baǵyttalýy tıis», - dedi Eljan Birtanov.
Sondaı-aq onyń sózine qaraǵanda, jergilikti atqarýshy organdardyń jaýapkershiligi lıtsenzııadan keıin baqylaý, kadrlyq qamtamasyz etý jáne medıtsınalyq mekemelerdiń menshik nysanyna qaramastan standarttarǵa sáıkes bolýyn baqylaý jaǵynan da kúsheıtiledi.
«Jalpy alǵashqy medıtsınalyq kómektiń sapasyn jaqsartý boıynsha qabyldanǵan sharalar birinshiden, alǵashqy medıtsınalyq kómek uıymdarynda medıtsınalyq qyzmetterdiń qoljetimdiligi men sapasyn joǵarylatýǵa múmkindik beredi. Ekinshiden, sapany arttyrýdyń ekonomıkalyq turǵydan yntalandyrý faktorlaryn qurýǵa múmkindik beredi. Úshinshiden, kadrlarmen tolyqtyrýdy qamtamasyz etip, medıtsına qyzmetkerleriniń quzireti men yntalandyrý sharalaryn arttyrady. Tórtinshiden, medıtsınalyq qyzmet kórsetý sapasyna memlekettik baqylaý tıimdiligin joǵarylatady», - dedi mınıstr.