Jergilikti ákimdikterge halyqty PTR testileýmen qamtý tapsyryldy

NUR-SULTAN. QazAqparat – Úkimet basshysy Asqar Mamın búgin QR aýmaǵynda koronavırýs ınfektsııasynyń taralýyna jol bermeý jónindegi vedomstvoaralyq komıssııanyń (VAK) selektorlyq otyrysynda óńirlerdiń ákimdikterine birqatar tapsyrma berdi, dep habarlaıdy QazAqparat.

Úkimet basshysy atalǵan otyrysta óńirlerdiń ákimdikterine myna máselelerdi pysyqtaýdy tapsyrdy:

- medıtsınalyq uıymdar bazasynda qosymsha zerthanalar ashý arqyly halyqty PTR-testileýmen qamtýdy keńeıtý;

- aýrýhanalarda ınfektsııalyq jáne provızorlyq oryndar sanyn kóbeıtý;

- menshik nysanyna qaramastan, óńirde bar resýrstardy tarta otyryp, naýqastardy KT-zertteýmen qamtamasyz etý;

- jedel medıtsınalyq járdem stantsııalarynyń shuǵyl jáne kezek kúttirmeıtin shaqyrýlarǵa ýaqytyly qyzmet kórsetýin qamtamasyz etý;

- úılerinde jatqan patsıentterge ambýlatorlyq-emhanalyq kómek deńgeıinde sapaly dınamıkalyq baqylaý jasaý (qashyqtan, mobıldi brıgadalardyń kómegimen);

- halyqqa belsendi aqparattyq-túsindirý jumystaryn júrgizý.

Eske salsaq, QR Premer-Mınıstri Asqar Mamınniń tóraǵalyǵymen QR aýmaǵynda koronavırýs ınfektsııasynyń taralýyna jol bermeý jónindegi vedomstvoaralyq komıssııanyń (VAK) selektorlyq otyrysy ótti. QR Prezıdenti Qasym-Jomart Toqaevtyń tapsyrmasyna sáıkes Qazaqstandaǵy epıdemıologııalyq jaǵdaıdy turaqtandyrý boıynsha qosymsha sharalar qaralǵan bolatyn.

Keshe Prezıdent Qasym-Jomart ToqaevÚkimet epıdemıologııalyq jaǵdaıdy turaqtandyrý sharalaryn jarııalaıdy degen edi.