Jergilikti ákimdikterdiń elektrondyq bazasynda munaı ónimderiniń esebi júrgiziledi
Bul týraly QR Premer-Mınıstri Álıhan Smaıylov Senat depýtattarynyń saýalyna joldaǵan jaýabynda aıtty.
«Búgingi tańda dızel otynynyń baǵasyna kórshi eldermen aıtarlyqtaı dısparıteti baıqalady. Mysaly, Qazaqstanda ortasha baǵa 235-250 teńge/lıtr, al Reseıde 370-380 teńge/lıtr, Ózbekstanda 515-520 teńge/lıtr, Qyrǵyzstanda 400-410 teńge/lıtr quraıdy. Kórsetilgen baǵa aıyrmasy munaı ónimderin shekara mańyndaǵy elderge áketilýine alyp keldi jáne ishki naryqtaǵy maýsymdyq otyn tapshylyǵynyń faktorlarynyń biri bolyp tabylady. Osyǵan baılanysty Úkimet ishki naryqty qamtamasyz etý jáne janar-jaǵarmaı eksportynyń zańsyz shemalaryn joıý jóninde júıeli sharalar qabyldaýda», - delingen jaýapta.
Úkimet basshysy qazir el aýmaǵynan munaı ónimderiniń jekelegen túrlerin avtokólikpen alyp shyǵýǵa tyıym bar ekenin eske salady.
«Sondaı-aq resýrs ustaýshylardyń otyndy ótkizýin baqylaý kúsheıtildi. «QazMunaıGaz» UK» AQ men «Petrosun» JShS-nyń munaı ónimderin aýyl sharýashylyǵy taýarlaryn óndirýshilerge, janarmaı quıý stantsııalary bólshek saýda jelilerine jáne kommýnaldyq kásiporyndarǵa basymdyqpen bólýi belgilendi. Bıylǵy birinshi toqsanda jergilikti atqarýshy organdardyń elektrondyq bazasynda óńirlik janarmaı quıý stantsııalary jelilerimen birlesip munaı ónimderiniń jekelegen túrlerin esepke alý júıesi iske qosylady, bul janar jaǵar maı ótkizýdi tolyq baqylaýǵa múmkindik beredi», - dep jazady Álıhan Smaıylov.