Jerge qaýipti asteroıd jaqyndap keledi

NUR-SULTAN. QazAqparat – AQSh Ulttyq aeronavtıka jáne ǵarysh basqarmasy (NASA) kelesi aıda úlken asteroıdtyń jerge jaqyndaıtynyn málim etti, dep habarlaıdy QazAqparat Newsweek saıtyna silteme jasap.

NASA baǵalaýyna saı, 2001 CB21 asteroıdy 4 naýryz kúni shyǵys ýaqyty boıynsha tańǵy 3:00-de Jerge jaqyn keledi. Aspan denesiniń dıametri – 1,3 kılometr.

Onyń jyldamdyǵy - saǵatyna 26 800 mılıa bolmaq. Bul vıntovkadan atylǵan oqtyń jyldamdyǵynan 13 ese, joıǵysh ushaqtyń maksımaldy jyldamdyǵynan 18 ese tez.

NASA-nyń Jerge jaqyn obektilerdi zertteý ortalyǵynyń (CNEOS) málimdeýinshe, alańdaýǵa sebep joq. Asteroıd «yqtımal qaýipti» obektiler sanatyna jatady.

Alaıda jaqyn arada ol Jermen betpe-bet kelmeıdi, sebebi asteroıd 3 mıllıon mılıa qashyqtyqta bolmaq.

Asteroıdtyń «yqtımal qaýipti» bolyp belgilenýi onyń bizge soǵylatynyn bildirmeıdi. Mundaı ataýǵa Jerge óte jaqyn kelgen obektiler ıe bolady.

2001 CB21 asteroıdy Kúndi tolyǵymen 384 kúnde aınalady. Bul bizdiń ǵalamsharymyzdyń kórsetkishine jaqyn. Atalǵan asteroıdtyń kólemi oǵan uqsas túrlerden edáýir úlken (97%).

30 qańtar kúni ıtalııalyq astronom Djanlýka Ması 2001 CB21 asteroıdynyń sýretin túsirdi. Oǵan sáıkes, aspan denesi sol kezde Jerden 35 mıllıon kılometr qashyqtyqta bolǵan.

Al 6 naýryz kúni 2001 CB21 Jerge kezekti ret jaqyndamaq, ekeýiniń arasy 4,8 mıllıon kılometr bolady.

Eske sala keteıik, 1994 PC1 asteroıdy 18 qańtar kúni Jerge jaqyn keldi. Onyń eni - 1 shaqyrym.