Jerdiń ıesi halyq degen normany Konstıtýtsııada birjola bekitýdiń saıası máni zor – Prezıdent
Memleket basshysy Qasym-Jomart Toqaev Konstıtýtsııaǵa ózgerister men tolyqtyrýlar engizý jónindegi keńes otyrysynda osylaı dedi, dep habarlaıdy QazAqparat.
Otyrysta Prezıdent Qasym-Jomart Toqaev qoǵam men memleket úshin asa mańyzdy sanalatyn Jerge ıelik etý máselesin sheshý qajettigine arnaıy toqtaldy.
«Jerdiń jáne tabıǵı resýrstardyń ıesi halyq degen normany Konstıtýtsııada birjola bekitýdiń saıası máni zor bolmaq jáne bolashaqta bul máseleni ártúrli túsindirýge jol berilmeýi kerek. Osyǵan baılanysty, Negizgi zańnyń 6-babyn mynadaı redaktsııada berý usynylady: «Jer jáne onyń qoınaýy, sý, ósimdikter jáne janýarlar álemi, basqa da tabıǵı resýrstar halyqqa tıesili. Memleket halyq atynan menshik ıeligin júrgizýge quqyly», – dedi Prezıdent.
Osy rette Memleket basshysy az ýaqytta óte kóp is bitirgeni úshin Jumys tobynyń múshelerine rızashylyǵyn bildirdi.
«Men búgin Konstıtýtsııaǵa ózgerister men tolyqtyrýlar engizý týraly zań jobasyn Konstıtýtsııalyq Keńestiń qaraýyna usynamyn. Bul – Ata zańymyzdyń talaby. Konstıtýtsııaǵa engiziletin túzetýler Táýelsiz Qazaqstan tarıhynyń kelesi paraǵyn ashady dep senemin. Muny Jańa Qazaqstandy qurý jolyndaǵy mańyzdy beles deýge bolady», – dep túıindedi Qasym-Jomart Toqaev.