Jerdi saýda men saıasattyń quralyna aınaldyrmaýymyz kerek - senator
«Qazaqtyń jeri - qazaqtyń jany men demi, tirshiligi, Táýelsizdigimizdiń tiregi. Jer - ultaralyq tatýlyqtyń negizi. Birneshe ǵasyrlar boıy otarlaý saıasatynyń zardabyn tartqan qazaq halqy sheteldikterge jerdi jalǵa berýdi qabyldaı bermeıtindikterine kózimiz anyq jetkendeı boldy. Osy bir kóńil aýanyn eskerip, jerdi saýda men saıasattyń quralyna aınaldyrmaýymyz kerek. Jer taǵdyryna halyq alańdap otyr, «jer halyqtyń ortaq baılyǵy, jekeshelenbeıdi, satylmaýy kerek» degen oı-pikirler buryn da, qazir de aıtylyp keledi. Bizder muny eskerýimiz kerek. Sondyqtan da bolashaqta jerdi paıdalanýdyń osy kezge deıin qoldanylyp kele jatqan jalǵa berý túrin ǵana negiz etip alǵanymyz durys», - dedi Murat Baqtııaruly.
Al senator Tóleýbek Muqashev qazirgi ýaqytta aýyl turǵyndary jer ýchaskelerin rásimdeý úshin kóptegen kedergilerge tap bolyp otyrǵanyn aıtty.
«Ásirese bul másele alshaq jerde ornalasqan aýyl turǵyndaryna óte qıyn. Sondyqtan aýyl ákimi jer ýchaskelerin jekemenshikke nemese ony paıdalanýǵa berý qyzmetin óz moınyna alýy tıis. Osylaısha aýyl turǵyndary úshin ákimshilik tosqaýyldardyń qaýpi tómendeıdi. Taǵy da bir másele, jer ýchaskesin shekti normasyn ulǵaıtýdy qajet etedi. Ásirese, aýyldy eldi mekenderde oryndy bolyp tabylady. Sebebi, barshamyzǵa aýyldyń jaǵdaıy málim. Aýyl turǵynynyń kúnkórisi jermen baılanysty. Óziniń ýchaskesine jermen qosa qorasyn da, monshasyn da, saraıyn da turǵyzýy qajet», - dedi senator.
Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń hatshysy Rashıt Ákimov jer qatynastaryn retteý máselelerin kózdeıtin zańnyń qabylanýyna baılanysty Úkimettiń aldynda birqatar máseleniń turǵanyn atap ótti.
«Úkimet aldynda osy ótpeli kezeń dep otyrǵan ýaqyt aralyǵynda aýyl sharýashylyǵy jerlerine qatysty máselelerdi saıası-ekonomıkalyq jáne áleýmettik turǵydan saraptap, jan-jaqty zerdeleý mindeti tur. Keleshekte osy máselege baılanysty taǵy naqty usynystardyń bolary da anyq»,- dedi Rashıd Ákimov.
Aıta keteıik, búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine jer qatynastaryn retteý máseleleri boıynsha ózgerister men tolyqtyrýlar engizý týraly» QR Zańy qabyldandy.