Jerdi memleketke májbúrlep qaıtarýdyń tártibi naqtylandy

ASTANA. QazAqparat - Memleket qajettiligi úshin jer telimin qaıtarýdyń aldynda múlik ıesine onyń naryqtaǵy quny nemese basqa jer telimi beriledi. Bul týraly Májilistegi jalpy otyrysta «Qazaqstan Respýblıkasynyń keıbir zańnamalyq aktilerine menshik quqyǵyn qorǵaýdy kúsheıtý jáne tórelik máseleleri boıynsha ózgerister men tolyqtyrýlar engizý týraly» zań jobasyn talqylaý barysynda QR Ádilet mınıstri Marat Beketaev málim etti, dep habarlaıdy QazAqparat.

«Jer ýchaskelerin memleket muqtajy úshin májbúrlep alyp qoıýǵa qatysty túzetýler qamtylǵan. Atap aıtqanda, jer ýchaskelerin memleket qajettigine májbúrlep alýǵa onyń naryqtyq baǵa qunymen nemese basqa da jer telimin berý sharty saqtalǵan kezde ǵana jol berý usynylyp otyr»,  - dedi Beketaev.

Talqylaýlardan keıin palata depýtattary zań jobasyn birinshi oqylymda maquldady.  Zań jobasy aıasynda 16 zańnamalyq aktige, onyń ishinde 8 kodekske túzetýler qarastyrylady. Jalpy alǵanda, zań jobasy menshik ıeleriniń quqyqtaryn qorǵaýdy qamtamasyz etýge baǵyttalǵan túzetýlerdiń bes tobyn qamtıdy.