Jerde uıyqtap jatqan órt sóndirýshilerdiń sýreti kópti tánti etti

QOSTANAI. QazAqparat – Áleýmettik jelilerde Qostanaı oblysyndaǵy qyzyl jalynmen kúresten keıin, úrlemeli qaptarda uıyqtap jatqan órt sóndirýshilerdiń sýreti jarııalandy. Bul jarııalanymǵa qazaqstandyqtar qyzý qoldaý kórsetip, qutqarýshylarǵa izgi tilegen jazdy, dep habarlaıdy QazAqparat tilshisi.

«Naǵyz batyrlar», «Sizder óz mıssııalaryńyzdy abyroımen oryndadyńyzdar», «Mine, naǵyz qurmetke laıyq azamattar», «Sizderge alǵysymyz sheksiz», «Jaraısyńdar, jigitter», «Eń qaýipti ári baǵalana bermeıtin kásip» degen pikirler arqyly áleýmettik jeli qoldanýshylary qutqarýshylarǵa qoldaý bildirdi.

Eske salaıyq, Qostanaı oblysy Áýlıekól aýdanyndaǵy órt saldarynan 43 myń gektar orman órtendi. Sondaı-aq, tilsiz jaý kesirinen 108 qurylys nysany tolyq janyp ketti.

Sonymen qatar, qyzyl jalyn saldarynan 12 adam túrli jaraqat alyp, 1935 jyly týǵan turǵyn kóz jumdy. Al, órt bastalǵannan beri 2091 adam qaýipsiz jerlerge kóshirildi.

Jedel shtabtyń qazirgi ýaqyttaǵy málimeti boıynsha, órt tolyq baqylaýda. Eldi mekenderge qaýip tónip turǵan joq.

Foto: instagram.com/sko_kz