Jerdi bólýge arnalǵan konkýrstarǵa talap kúsheıedi

<p>ASTANA. KAZINFORM - Áleýetti menshik ıelerine qoıylatyn topyraq sapasyn, ósimdik jamylǵysyn saqtaý, jaıylymdardyń tozýyn boldyrmaý, aýyspaly egisterdi saqtaý jáne jerdi utymdy paıdalaný tıimdiligin arttyrý boıynsha basqa da qarsy mindettemeler qoldanystaǵy konkýrstardaǵy talaptarda kúsheıtiletin bolady. Bul týraly primeminister.kz. saıty jazdy.&nbsp;</p>

Mundaı tapsyrmany 2024 jylǵy 3 sáýirde ótken paıdalanylmaı jatqan jáne zańnamany buza otyryp berilgen jerlerdi alyp qoıý máseleleri jónindegi komıssııanyń kezekti otyrysynyń qorytyndysynda Premer-Mınıstrdiń orynbasary Serik Jumanǵarın berdi. 

Foto: primeminister.kz.

Jer resýrstaryn basqarý komıtetiniń tóraǵasy Murat Temirjanovtyń aıtýynsha, 2024 jyldyń basynan beri aýyl sharýashylyǵy maqsatyndaǵy 391,2 myń gektar, al 2022-2024 jyldary barlyǵy 10,4 mln gektar jer memleket menshigine qaıtarylǵan. Onyń 3,7 mln ​​ga jeri jergilikti halyqqa qaıta bólindi (jalpy maqsattaǵy mal jaıýǵa – 1,72 mln ga, konkýrstyq negizde bólip paıdalanýǵa – 1,69 mln ga).

«Aıta ketý kerek, aýyl sharýashylyǵy jerleriniń 4,4 mln ga nemese 2022 jyldan bastap el boıynsha qaıtarylǵan barlyq jerdiń 44%-y buryn 204 iri kásipkerlik sýbektileriniń qolynda bolǵan», — dep habarlady Murat Temirjanov.

Jaıylym tapshylyǵyn azaıtý úshin ákimdikterge, jalpy paıdalanýǵa, mal jaıý úshin 562,1 myń ga jaıylymdyq jer bekitilip berilgen, 65,1 myń ga jaıylym jer paıdalanýǵa konkýrstyq negizde berilgen, 746,6 myń ga rezervke qoıylǵan. Eldi mekender shegine 97,3 myń ga jaıylymdyq jer engizildi.

Foto: primeminister.kz.

«Búginde bizdiń negizgi mindetimiz – jerdi qaıtarý ǵana emes, tıimdi paıdalaný jáne jer paıdalanýshylardy baqylaý. Alynǵan jerlerdi paıdalaný men jaqsartý úshin jaýapkershilikti kúsheıtý qajet. Baıqaý sharttaryn bıznes-qoǵamdastyqpen, ákimdiktermen jáne basqa da múddeli qatysýshylarmen talqylaǵan jón. Topyraqty, ósimdik quramyn saqtaý, zamanaýı tehnologııalardy paıdalaný boıynsha qarsy mindettemeler qoıý kerek. Ol úshin jerdi bólýdiń jańa erejeleri men prıntsıpterin ázirleý qajet», — dedi Serik Jumanǵarın.

Pılottyq rejımde Memlekettik jer kadastrynyń jáne tehnıkalyq zertteýdiń avtomattandyrylǵan aqparattyq júıesi 2.0 jer paıdalanýshynyń eseptik jazbasy quryldy. Onda topyraqtyń (qarashirik, jyljymaly mıneraldar) jáne ósimdik jamylǵysynyń jaı-kúıiniń joǵary sapaly agrohımııalyq sıpattamasy bar jer ýchaskesi týraly aqparat bolady. Ony utymdy paıdalaný krıterıılerine sáıkestigin qamtamasyz etý úshin bes jyl saıyn ýchaskeni zertteý jumystary júrgiziletin bolady. Eger ónimdiliktiń nasharlaýy anyqtalsa, tıisti sharalar qabyldanady.