Jer zańnamasyn buzǵan sheneýnikterge jaýapkershilik kúsheıtilmek

ASTANA. QazAqparat – Parlament Májilisiniń jalpy otyrysynda «QR Ákimshilik quqyq buzýshylyq týraly kodeksine jerlerdiń paıdalanylýy men qorǵalýyn memlekettik baqylaý máseleleri boıynsha ózgerister men tolyqtyrý engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

Zań jobasynyń maqsaty - jer qatynastary salasynda azamattarǵa qyzmet kórsetý kezinde jáne Ákimshilik quqyq buzýshylyq týraly kodeksiniń normalaryn salalyq zańnamaǵa sáıkes keltirý kezinde jergilikti atqarýshy organdardyń laýazymdy adamdarynyń jaýapkershiligin kúsheıtý.

«Zań jobasymen jerdiń paıdalanylýy men qorǵalýyna memlekettik baqylaýdy júzege asyratyn memlekettik organdardy aıqyndaý bóliginde Ákimshilik quqyq buzýshylyq týraly kodekstiń salalyq zańnamalyq aktilerine sáıkes keltirý kerek. Osy oraıda tıisti túzetýler engizý usynylyp otyr. Sonymen qatar, jer qatynastary salasyndaǵy qyzmetterdi sapasyz nemese ýaqtyly kórsetpegeni úshin jergilikti atqarýshy organdardyń laýazymdy adamdarynyń jaýapkershiligi belgilenedi. Atalǵan zań jobasyn iske asyrý jergilikti atqarýshy organdar kórsetetin qyzmetterdiń sapasyn arttyryp, halyqtyń jalpy memlekettik apparatqa degen senimin arttyrady», - dedi QR Aýyl sharýashylyǵy mınıstri Erbol Qarashókeev.

Onyń aıtýynsha, osy qujat aıasynda Úkimet eki qorytyndyny ázirlep, bireýi QR Parlamenti Májilisiniń qaraýyna engizildi.

«Parlament depýtattarynyń túzetýleri boıynsha Úkimettiń ekinshi qorytyndysy QR Premer-Mınıstriniń Keńsesinde kelisýden ótip jatyr. Tutastaı alǵanda, zań jobasy qoldanystaǵy zańnamalyq aktilerge sáıkes keledi, sondaı-aq teris áleýmettik-ekonomıkalyq saldarlarǵa ákep soqpaıdy jáne respýblıkalyq bıýdjetten qosymsha qarajat bólýdi talap etpeıdi», - dedi mınıstr.