Jer ýchaskesin bere salý qıyn emes - Berdibek Saparbaev

AQTÓBE. QazAqparat - Aqtóbe oblysynda 140 myńnan astam adam jer telimi kezeginde tur. Jer jetkilikti, biraq ınfraqurylym jetkizý qıyn. Bul týraly Aqtóbe oblysynyń ákimi Berdibek Saparbaev qala ákiminiń esebinde aıtty, dep habarlaıdy QazAqparat tilshisi.

Aqtóbede jer kezeginde turǵan adamdar sany jyl ótken saıyn artyp barady. Aýdan, qala, oblys ákiminiń esep berý kezdesýlerine barǵan adamdar da aldymen jer ýchaskesin suraıdy. Qazirgi kezde oblys boıynsha 140 myńnan astam adam jer kezeginde tur. Bári elektrondy bazaǵa engizilgen.

«Jer kezegine turǵan adamdar sany jaǵynan Aqtóbe elimizdegi joǵary kórsetkishke jetkin óńirlerdiń biri. Kezekte turǵyndarǵa jyl saıyn 15-17 myń jer telimi beriledi. Bul Qazaqstanda beriletin jer teliminiń 30 paıyzyn quraıdy. Adamdar «jer kóp, nege jer bermeısizder?» dep jazady. Jer jetkilikti. Biraq sý, jylý, jol, jaryq joq degen másele týyndaıdy. Aldymen ınfraqurylym jetkizilip, keıin jer beriledi»,- dedi Aqtóbe oblysynyń ákimi Berdibek Saparbaev.

Halyqpen júzdesý kezinde óńir basshysy saıajaılardaǵy quqyq buzýshylyqqa toqtaldy. Ótken jyly saıajaılardyń barlyǵy esepke alynyp, sanaq júrgizildi.
 

«Tótenshe jaǵdaı bolsa órt sóndirýshiler men jedel járdem kire almaıdy. Buryn aryq bolǵan jerge úı salynǵan. Eki, úsh qabatty úıler esepke alynbaǵan. Halyqqa ótinish aıtamyz. Turǵyndar men ákimdik birlesip, saıajaılarda tártip ornatý kerek. Qylmys, quqyq buzýshylyqtyń kóbi sol baý-baqsha ujymdarynda tirkelip jatyr»,- dedi B.Saparbaev.