Jer ýchaskelerin zańsyz taratqan ákim men orynbasary sottaldy

NUR-SULTAN. QazAqparat – Mańǵystaý oblysyna qarasty Mańǵystaý aýylynyń ákimi men orynbasary jer telimderin berý barysynda laýazymdyq ókilettikterin asyra paıdalanǵany úshin sottaldy, dep habarlaıdy QazAqparat tilshisi.

«Mańǵystaý oblysynyń jemqorlyqqa qarsy qyzmeti «Munaıly aýdandyq sáýlet jáne qala qurylysy bólimi» memlekettik mekemesiniń bastyǵy A.Kóbegenovke, Mańǵystaý aýylynyń ákimi Q.Ótemuratov pen onyń orynbasary B.Qasymovqa qatysty jer telimderin berý barysynda laýazymdyq ókilettigin asyra paıdalaný faktisi boıynsha sotqa deıingi tergeý óndirisin aıaqtady», - delingen QR Sybaılas jemqorlyqqa qarsy is-qımyl agenttigi taratqan aqparatta.

Vedomstvo málimetinshe, atalǵan tulǵalar aýktsıon ótkizbeı jáne aqsha qarajatyn bıýdjetke aýdarmastan Mańǵystaý oblysynda 8 jer telimin jeke tulǵalar men kásipkerlik sýbektilerine bergen.

«Osy jyldyń 19 tamyzynda Munaıly aýdandyq sotynyń úkimimen Kóbegenov 4 jylǵa, Qasymov 3 jylǵa jáne Ótemuratov 3 jyl 6 aıǵa bas bostandyǵynan aıyryldy. Sottalǵandar memlekettik jáne jergilikti ózin-ózi basqarý organdarynda laýazymdy qyzmet atqarý quqyqtarynan ómir boıyna aıyryldy», - dep atap ótedi agenttikten.