Jer telimin paıdalaný quqyǵyn berý úshin para alǵan sheneýnikter ustaldy

NUR-SULTAN. QazAqparat – Ótken 2 aptada Sybaılas jemqorlyqqa qarsy qyzmet sotqa deıingi 97 tergeýdi tirkedi. 7 laýazymdy tulǵa ustalyp, 4 tulǵaǵa qatysty «kúzetpen ustaý» bultartpaý sharasy qoldanyldy jáne 244 072 mln teńge zalal óteldi. Bul týraly onlaın brıfıngte Agenttiktiń 1-shi departamentiniń asa mańyzdy ister jónindegi aǵa tergeýshisi Danııar Bıgaıdarov aıtty, dep habarlaıdy QazAqparat tilshisi.

«Aqmola oblysy boıynsha Sybaılas jemqorlyqqa qarsy qyzmet bir top adamnyń aldyn ala sóz baılasý arqyly para alý kúdigimen oblys aýdany ákiminiń orynbasary men «Sáýlet jáne qala qurylysy bólimi» MM basshysyna qatysty sotqa deıingi tergeý júrgizýde», - deıdi Agenttiktiń 1-shi departamentiniń asa mańyzdy ister jónindegi aǵa tergeýshisi Danııar Bıgaıdarov.

Onyń aıtýynsha, sheneýnikter 2 jer telimi boıynsha jer paıdalaný quqyǵyn berý týraly oń sheshim shyǵarǵany úshin kásipkerlik sýbektisinen 800 myń teńge somasynda para alý kúdigine ilindi.

«Aǵymdaǵy jyldyń 15 qazanynda kúdiktiler ustalyp, Kókshetaý q. PB ýaqytsha ustaý ızolıatoryna qamaldy. Bultartpaý sharasyn tańdaý týraly másele sheshilýde. Tergeý jalǵasýda», - deıdi ol.