Jer telimderi týraly aqparat ashyq jarııalanýy qajet - Bolat Palymbetov

ASTANA. QazAqparat - Atqarýshy bılik jer telimderine qatysty aqparatty ashyq jarııalaýǵa asyqpaı otyr. Aımaqtarda kommertsııalyq maqsatta jer telimin alý máselesi ózekti bolyp tur. Bızneske tıesili jerdi tartyp alý oqıǵalary da az emes, dep habarlaıdy QazAqparat tilshisi.

Qazaqstan kásipkerleriniń quqyqtaryn qorǵaý jónindegi ýákil Bolat Palymbetovtyń aıtýynsha, qazirgi zańnamada eldi mekenderdiń bas josparlary men ınjenerlik kommýnıkatsııalary jergilikti bıliktiń  ınternet resýrstarynda jarııalanýy qajet. Alaıda bul talaptar tolyǵymen oryndalmaıdy. Tolyq aqparatty tek Astana men Almaty qalalary, sondaı-aq Aqmola, Qaraǵandy men Soltústik Qazaqstan oblystary ǵana ornalastyrǵan. Qalǵan aımaqtarda osy saladaǵy jumys baıaý atqarylyp keledi.

«Kim, qandaı maqsatta jer ýchaskesin alǵandyǵy týraly aqparat joq. Negizi, jer telimin satyp alǵan tulǵa, telimniń ornalasqan jeri men salynatyn nysan týraly tolyq aqparat bolýy qajet. Memlekettik organdarǵa ondaı aqparatty ashyq jarııalaýǵa mindetteý kerek. Bul usynysty Aýyl sharýashylyǵy mınıstrligi qoldap otyr. Qazir kásipkerlik qyzmetti retteýdi jetildirý máseleleri jónindegi zań jobasyna tıisti ózgertýler engizý josparlanǵan», - dedi Palymbetov búgin «Atameken» UKP prezıdıýmnyń keńeıtilgen otyrysynda.

Onyń sózine qaraǵanda, búginde kásipkerlerden jer telimderin tartyp alý oqıǵalary da az emes. Ondaı jaǵdaılar Qazaqstannyń barlyq aımaqtarynda kezdesedi.

«Mysaly, Almaty qalasynda jyl boıyna 1000-nan astam statsıonarlyq emes saýda obektilerin májbúrlep bólshektegen. Sonyń ornyna basqa jer telimderi berilmedi. Onyń saldarynan kásipkerler bıznesterin jabýǵa májbúr boldy», - dep atap kórsetti ýákil.