Jer silkinisinen qabyrǵalary jarylǵan mekteptiń oqýshylary bıyl da qashyqtan oqı ma

<p>QONAEV. KAZINFORM — Almaty oblysy Іle aýdany Boraldaı aýylynyń turǵyndary № 40 mektepte jóndeý jumystarynyń aıaqtalmaǵaynyna narazylyq bildirdi.</p>

Boraldaı aýyly Jaınaq yqshamaýdanynyń ata-analary oblystyq bilim basqarmasy men aýdan ákimshiligine shaǵym bildirdi. 

Turǵyndardyń aıtýynsha, 2016 jyly salynǵan № 40 mektep bıyl aqpan aıyndaǵy jer silkinisinen keıin jaramsyz bolyp qalǵan.

Jer dúmpýi kezinde mektep qabyrǵalary jarylyp, oqýshylar oqý jylynyń jartysyn onlaın oqyǵan.

Qazirgi ýaqytta aıtylǵan mektepte jóndeý jumystary júrgizilip jatqan joq. Bul jaıtty nazarǵa alǵan ata-analar balalary jańa oqý jylynda úıden oqýǵa májbúr bolýy múmkin ekenin aıtady.

Bul jaǵdaıǵa baılanysty joldaǵan saýalymyzǵa jaýap bergen Almaty oblysynyń ákimdigi mektepte jóndeý jumystary bastalǵanymen qosymsha qarjylandyrý suratylǵandyqtan protsess keshigip jatqanyn habarlady.

— Jer silkinisinen keıin № 40 mekteptiń qabyrǵalaryndaǵy jaryqtardyń úlkeıip ketýine baılanysty, vızýaldy sholý jasalyp, nátıjesi boıynsha akt toltyryldy. Іle aýdany ákimdigi janynan mekteptiń jaǵdaıyn baǵalaý jónindegi komıssııa quryldy. Komıssııalyq tekserý qorytyndysy boıynsha, mektep oqýshylary men qyzmetkerlerdiń densaýlyǵyna zııan tıgizetindeı zaqym anyqtalyp, Іle aýdany ákiminiń sheshimimen ǵımarat apatty dep tanyldy. 5 naýryzdan bastap № 40 orta mektepte oqytý formaty onlaın rejımde júrgizildi. Qazirgi ýaqytta qurylys-jóndeý jumystary bastalǵan bolatyn, alaıda qosymsha qarjylandyrý suratylǵandyqtan protsess keshigip jatyr, — dep habarlaıdy oblystyq ákimdikten.

Sondaı-aq Almaty oblysy ákimdiginiń baspasóz qyzmeti jańa oqý jyly bastalǵanǵa deıin jóndeý jumystary aıaqtalmaǵan jaǵdaıda 1-11 synyptar — bas-aıaǵy 1906 oqýshy jaqyn ornalasqan bilim mekemelerine tasymaldap oqytylatynyn málimdedi. 

Atap aıtqanda, № 17 orta mektepke — 650 oqýshy, № 54 orta mektepke — 380 oqýshy, № 39 gımnazııaǵa — 330 oqýshy jáne № 42 orta mektepke 360 oqýshy bólinedi.

Eske sala keteıik, buǵan deıin Almaty oblysynda bıyl aqpandaǵy jer silkinisinen 44 nysanda jaryqshaq paıda bolǵanyn jazǵan edik.  

Al Eńbekshiqazaq aýdanynda jańa salynǵan mekteptiń qabyrǵalary jarylyp ketti.

Almatyda da mektepter men jataqhanalardyń ǵımaraty búlindi.