Jer silkinisi kezinde janarmaı quıý stansasyna jolamaǵan jón — seısmolog

<p>ALMATY. KAZINFORM — Tótenshe jaǵdaı kezinde janarmaı quıý stansasyna barý qaýipti. Bul týraly brıfıng barysynda Seısmologııalyq baqylaý jáne zertteý ulttyq ǵylymı ortalyǵynyń dırektory Dáýlet Sársenbaev aıtty.</p>

Mamandar jer silkinisi kezinde janarmaı quıý stansasyna barmaǵan jón dep esepteıdi. Óıtkeni, joıqyn jer silkinisi jaǵdaıynda qaıtalama faktorlar — jarylystar, órtter bolýy múmkin.

«Qandaı da bir sebeppen bizdiń azamattar resmı derekkózden alynǵan málimetterge senbeıdi. Eń aldymen resmı uıymdarǵa — TJD, qutqarý qyzmeti, jergilikti atqarýshy organnyń málimetine senýge shaqyramyn. Adamdar kórshi chattaryna emes, óz isimen aınalysatyn mamandarǵa senýi kerek. Bizdiń mindetimiz — jýrnalıstermen birlesip azamattarǵa resmı derekterdi jetkizý. Qoǵamda tótenshe jaǵdaılarǵa den qoıý mádenıetin engizý qajet», — deıdi Dáýlet Sársenbaev.