Jer sharyn tórt ret aınalyp shyqqanmen birdeı – Bıyl Prezıdent ushaǵy 158 myń shaqyrym saparlaǵan

<p>ASTANA. KAZINFORM &ndash; Bir jyl ishinde elimizdiń birinshi borty 158 983 shaqyrymdy ushyp ótti. Prezıdent Qasym-Jomart Toqaev ushaq pen tikushaqta 245 saǵat 18 mınýtyn ótkizdi. Bul &ndash; jer sharyn tórt ret aınalyp shyqqanmen birdeı qashyqtyq. Bul týraly QR Prezıdentiniń keńesshisi &ndash; Baspasóz hatshysy Berik Ýálı Egemen Qazaqstan gazetinde jazdy.</p>

– Jyl basynan beri Memleket basshysy Qatar, Ázerbaıjan, Sıngapýr, Tájikstan, Mońǵolııa, Frantsııa jáne Majarstan elderine memlekettik saparmen, al Italııa, Vatıkan, Armenııa, Túrikmenstan jáne Serbııa elderine resmı saparmen bardy. Mundaǵy keıbir elderge Qazaqstan Prezıdentiniń sońǵy 20 jylǵa jýyq ýaqyttan keıin alǵash ret saparlaǵanyn atap ótken jón. Bul Memleket basshysynyń jan-jaqty yqpaldastyqqa basa nazar aýdaratynyn ańǵartady, – dep jazdy Berik Ýálı.

Memlekettik jáne resmı saparlardan bólek Prezıdent túrli halyqaralyq is-sharalarǵa qatysý úshin 11 elge jumys saparymen bardy. Budan basqa, elimizge túrli deńgeıdegi saparmen kelgen 11 shet memlekettiń basshylaryn qabyldap, kelissózder júrgizdi.

– Elimizdiń syrtqy saıasattaǵy jetistikterine arnaıy toqtalǵan jón. Qazaqstan bıyl alty halyqaralyq uıymǵa, atap aıtqanda, ShYU, TMU, AÓSShK, UQShU-ǵa, Azyq-túlik qaýipsizdigi jónindegi Islam uıy­myna, sondaı-aq Halyqaralyq Araldy qutqarý qoryna tóraǵalyq etti. Frantsııamen birge Er-Rııad qalasynda One Water sammıtin uıymdastyrdy. Osy jaýapty mıssııalardy elimiz abyroımen atqaryp shyqty. Joǵary deńgeıdegi kezdesýlerde mańyzdy bastamalar kóterip, tıisti qujattardyń qabyldanýyna uıytqy boldy. Egemen ári derbes el retinde óziniń saıası, ekonomıkalyq, áskerı qaýipsizdik salalaryndaǵy basymdyqtaryn ilgerilete tústi, - deıdi Prezıdent keńesshisi.

Aıta keteıik, Berik Ýálı Memleket basshysy Qasym-Jomart Toqaevtyń jyl boıy atqarǵan qyzmetine sholý jasap, qoǵamdyq-saıası ómirdegi, áleýmettik-ekonomıkalyq damýdaǵy irgeli ózgerister men tabystar týraly baıandady.

Prezıdent bıyl jumys saparymen elimizdiń 11 óńirine bardy. Aımaqtardaǵy 60-tan asa óndiristik jáne áleýmettik-mádenı nysandarmen tanysyp, jurtshylyqpen kezdesti.

Sondaı-aq, Memleket basshysy bıyl 3 979 qujatty qarap, qol qoıdy. Onyń ishinde 95 zań, 319 jarlyq, 81 ókim, 28 otyrys hattamasy, 3 456 qyzmettik qujat qabyldandy.