Jer resýrstaryn qorǵaý salasynda qosymsha jaýapkershilik engiziledi

ASTANA. QazAqparat – Májilistiń jalpy otyrysynda «QR Ákimshilik quqyq buzýshylyq týraly kodeksine jerlerdiń paıdalanylýy men qorǵalýyn memlekettik baqylaý máseleleri boıynsha ózgerister men tolyqtyrý engizý týraly» Zańy ekinshi oqylymda qaralyp, qabyldandy, dep habarlaıdy QazAqparat tilshisi.

Palata zań jobasyn 2022 jylǵy 28 jeltoqsanda birinshi oqylymda maquldaǵan bolatyn.

Zań jobasynyń maqsaty - jer qatynastary salasynda azamattarǵa qyzmet kórsetý kezinde jáne Ákimshilik quqyq buzýshylyq týraly kodeksiniń normalaryn salalyq zańnamaǵa sáıkes keltirý kezinde jergilikti atqarýshy organdardyń laýazymdy adamdarynyń jaýapkershiligin kúsheıtý.

Májilistiń Agrarlyq máseleler komıteti málimetine qaraǵanda, atalǵan qujatty talqylaý barysynda depýtattar zań jobasynyń negizgi maqsatyn iske asyrýǵa baǵyttalǵan keıbir erejelerin naqtylap, tolyqtyrdy. Atap aıtqanda, jergilikti atqarýshy organdardyń zańsyz sheshimder qabyldaýyna, olardyń jer qatynastary salasyndaǵy mindetterin oryndamaýyna nemese ýaqtyly oryndamaýyna qatysty.

Buǵan qosa, jer resýrstaryn qorǵaý jáne paıdalaný úshin jer quqyqtyq qatynastary sýbektileriniń qosymsha ákimshilik jaýapkershiligi kózdeledi.

Zań jobasyna jergilikti atqarýshy organdarǵa «Geodezııa, kartografııa jáne keńistiktik derekter týraly» QR Parlamenti qabyldaǵan Zańǵa sáıkes tıisti ákimshilik isterdi qaraý boıynsha ókilettikter beretin túzetýler engizildi.

Sonymen qatar Parlament qabyldaǵan «Qazaqstan Respýblıkasynyń keıbir zańnamalyq aktilerine Memleket basshysynyń jekelegen tapsyrmalaryn iske asyrý máseleleri boıynsha ózgerister men tolyqtyrýlar engizý týraly» Zańyna sáıkes keltirý úshin saýda qyzmetin memlekettik baqylaý salasyndaǵy ókilettikterdi jergilikti deńgeıden ortalyq deńgeıge berýge qatysty túzetýler kózdelgen.