Jer qoınaýyn paıdalanýshylar áleýmettik osal toptaǵy azamattardy oqytýǵa qarjy bóledi

ASTANA. QazAqparat – Qazaqstandaǵy jer qoınaýyn paıdalanýshylarǵa halyqtyń áleýmettik osal toptarynan azamattardy oqytýǵa qarajat bólýge mindetteldi, dep habarlaıdy QazAqparat QR Energetıka mınıstrliginiń baspasóz qyzmetine silteme jasap.

Baspasóz qyzmetiniń málimetterine qaraǵanda, 2023 jylǵy sáýirde jer qoınaýyn paıdalanýshylardyń qazaqstandyq kadrlardy oqytýdy qarjylandyrý qaǵıdalaryna ózgerister kúshine endi.

Atalmysh qujatqa sáıkes, mynadaı negizgi túzetýler engizildi:

tehnıkalyq, kásiptik, orta bilimnen keıingi, joǵary jáne joǵary oqý ornynan keıingi bilim berý uıymdarynda, onyń ishinde dýaldi oqytý júıesinde bilim alýshylardyń kásiptik praktıkadan ótýi úshin qarajat bólý baǵyty qosyldy;

QR azamattarynyń biliktiligin arttyrýǵa, qaıta daıarlaýǵa qarajat bólý baǵyty qosyldy;

halyqtyń áleýmettik osal toptarynyń sanatyna jatatyn jer qoınaýyn paıdalanýshynyń jumyskerleri bolyp tabylmaıtyn qazaqstandyq kadrlardy oqytýǵa jer qoınaýyn paıdalanýshynyń mindettemeleriniń jalpy kóleminiń 30% mólsherinde mindetti eń tómengi shegi belgilengen.

Sonymen qatar halyqtyń áleýmettik osal toptarynyń tizimi keńeıtildi.

Atap aıtqanda, oǵan ata-anasynyń bireýi nemese ekeýi de múgedek bolyp tabylatyn azamattar; múgedek balalary bar nemese olardy tárbıelep otyrǵan otbasylar; densaýlyq saqtaý salasyndaǵy ýákiletti organ bekitetin aýrýlar tiziminde kórsetilgen keıbir sozylmaly aýrýlardyń aýyr túrlerinen zardap shegetin adamdar qosyldy.

Sondaı-aq Erejege memlekettik bilim berý uıymdarynyń materıaldyq-tehnıkalyq bazasyn jaqsartý úshin qajetti jumystar men qyzmetterdi satyp alýǵa qarajat jiberý týraly mindetteme engizildi. Bul jaǵdaıda jumystarǵa ǵımarattar men qurylystardy salý, kúrdeli jáne aǵymdaǵy jóndeý;

qyzmetterge: aqparattyq-kommýnıkatsııalyq ınfraqurylymnyń, serverlik jabdyqtyń obektileri men tehnologııalaryn iske qosý, baptaý, jóndeý jáne (nemese) aqparattyq qaýipsizdikti qamtamasyz etý, baǵdarlamalyq qamtamasyz etýdi ázirleý, beıimdeý jáne (nemese) qoldaný, derekterdi óńdeý jónindegi qyzmetter, sáýlet-jobalaý jumystary, ǵımarattar men qurylystardy salýǵa, kúrdeli jáne aǵymdaǵy jóndeýge baılanysty keshendi ınjenerlik qyzmetter.

Tizim QR Energetıka mınıstrliginiń saıtynda jarııalanǵan.