Jer komıssııasynyń otyrystary onlaın kórsetiletin boldy

ASTANA. QazAqparat - Jer komıssııasynyń otyrystary jergilikti atqarýshy organdardyń saıttarynda onlaında kórsetilip, barlyq aýdıo-beınejazba ákimdikterdiń serverlerinde saqtalýy kerek, dep habarlaıdy QazAqparat QR AShM Jer resýrstaryn basqarý komıtetine silteme jasap. 

Jer komıssııasy otyrysyn tirkeýdi qamtamasyz etetin aýdıo-beınejazba quraldaryn tehnıkalyq qoldaný, aýdıo-beınejazbany saqtaý qaǵıdalary jáne aýdıo-beınejazbaǵa qol jetkizý qaǵıdalary bekitildi.

«Endi Jer komıssııasynyń árbir otyrysy barysynda oblystardyń, respýblıkalyq mańyzy bar qalalardyń, astananyń, aýdandardyń, oblystyq mańyzy bar qalalardyń jergilikti atqarýshy organdarynyń (JAO) resmı ınternet-resýrstarynda onlaın translıatsııalaý rejıminde otyrystyń aýdıo-beınejazbasy júrgizilip otyrady. Jer komıssııasy otyrysynyń aýdıo-beınejazbasyn sanktsııalanbaǵan toqtatýǵa nemese túzetýge bolmaıdy. Barlyq aýdıo-, beınejazbalar JAO serverlerinde saqtalyp, olardyń kóshirmeleri Jer komıssııasy otyrysyna qatysýshylarǵa, sondaı-aq jer ýchaskesine quqyq berý týraly ótinish bergen adamdar men olardyń ókilderine beriledi», - delingen atalmysh komıtettiń Feısbýktegi paraqshasyndaǵy jazbada.