Jer kodeksiniń baptaryna moratorıı engizilýine qatysty qandaı jumystar atqarylýy kerek
«Endi, Jer komıssııasynyń búgingi otyrysynyń kún tártibine kóshsek. Ózderińizge belgili, 2016 jyly Memleket basshysynyń Jarlyǵymen Jer kodeksiniń jekelegen baptarynyń qoldanysyna moratorıı engizilgen bolatyn. Bul moratorıı 2021 jylǵy 31 jeltoqsanda aıaqtalady», - dep eske saldy mınıstr.
Engizilgen moratorııde mynadaı shekteýler kózdelgen:
- sheteldikterge, azamattyǵy joq adamdarǵa, sheteldik zańdy tulǵalarǵa aýyl sharýashylyǵy jerlerin jaldaý quqyǵyn berýge tyıym salý;
- jarǵylyq kapıtalynda sheteldik qatysý úlesi bar birlesken kásiporyndarǵa aýyl sharýashylyǵy jerlerin jeke menshikke satýǵa jáne jalǵa berýge tyıym salý;
- qazaqstandyqtarǵa aýyl sharýashylyǵy jerlerine arnalǵan jekemenshik quqyǵyn berýge tyıym salý;
- aýyl sharýashylyǵy maqsatyndaǵy jerlerdi jaldaý quqyǵyn memleketten satyp almaı ıelikten shyǵarýǵa tyıym salý.
«Sheteldikter boıynsha moratorıı normalaryna keler bolsaq, Qazaqstan Respýblıkasynyń Prezıdenti Qasymjomart Kemeluly Toqaev 2021 jylǵy 25 aqpanda Ulttyq qoǵamdyq senim keńesiniń besinshi otyrysynda bul jóninde túpkilikti saıası sheshim qabyldady. Atap aıtqanda, Memleket basshysy aýyl sharýashylyǵy maqsatyndaǵy jerler jeke menshikke satylmaıdy jáne sheteldikterge, azamattyǵy joq adamdarǵa, sheteldik zańdy tulǵalarǵa, Qazaqstan Respýblıkasynyń sheteldik qatysatyn zańdy tulǵalaryna, halyqaralyq uıymdarǵa, halyqaralyq qatysý úlesi bar ǵylymı ortalyqtarǵa, sondaı-aq qandastarǵa jalǵa berilmeıdi dep sheshti. Shuǵyl túrde tıisti zań jobasy ázirlenip, Parlament Májilisine arnaıy Joldaýmen engizildi, qazirgi ýaqytta ol jumys toptarynda qaralý satysynda», - dedi S. Omarov.
«Endi moratorııdiń keıbir máseleleri ǵana sheshilmegen kúıde tur, bular – aýyl sharýashylyǵy jerlerin jalǵa alý quqyǵyn alyp tastaı otyryp, qazaqstandyqtarǵa jekemenshikke berý, sondaı-aq jer paıdalanýshylardyń aýyl sharýashylyǵy jerlerin memleketten satyp almaı uzaq merzimdi jaldaý quqyǵyn ıelikten shyǵarýy máseleleri. Qazaqstandyqtar úshin jeke menshik máselesiniń tarıhyna qysqasha toqtalyp óteıin. Aýyl sharýashylyǵy maqsatyndaǵy jerlerge jeke menshik quqyǵy 2003 jyldan bastap zańnama júzinde bekitilip berilip, aýyl sharýashylyǵy jerin ne jeke menshikke satyp alýǵa ne 49 jylǵa deıin uzaq merzimdi jalǵa alýǵa múmkindik berildi. 2015 jyly Jer kodeksine ózgerister engizildi, onyń aıasynda qazaqstandyqtarǵa aýyl sharýashylyǵy jerlerin 49 jylǵa deıin jalǵa berý múmkindigi alyp tastaldy. Jańa ózgeris aýyl sharýashylyǵy jerlerin qazaqstandyqtarǵa jekemenshik quqyǵymen ǵana berýdi kózdedi. Bul úshin jumys istep turǵan jer paıdalanýshylar memleketten aýyl sharýashylyǵy jerlerin kadastrlyq qunynyń 50%-y mólsherindegi jeńildikpen birjolǵy tólemmen nemese jerdiń tolyq qunyn 10 jyl boıy bólip tóleý shartymen jekemenshikke satyp alýǵa mindetti boldy. Aýyl sharýashylyǵy jerlerin jaldaý quqyǵyn memleketten satyp almaı ıelikten shyǵarý múmkindigine keler bolsaq, bul túzetý de 2015 jyly engizilgen bolatyn. Bul túzetýlerge 2016 jyly Memleket basshysynyń Jarlyǵymen moratorıı engizilip, tıisti Zań qabyldandy. Jer komıssııasynyń otyrystary aıasynda joǵaryda atalǵan máseleler boıynsha túpkilikti sheshim qabyldaý usynylady», - dedi mınıstr.