Jer daýy nemese suranys usynystan artyq
«Ótinish bergenderdiń barlyǵyna jeke turǵyn úı qurylysyn júrgizýge jer ýchaskelerin berý múmkin emes. Sebebi kezekte turǵandardyń sany (100 myńǵa jýyq adam) 2030 jylǵa deıingi Astana qalasynyń Bas josparyna sáıkes jeke turǵyn úı qurylysyna bólingen aýdannan 4 ese artyq. Búgingi tańda 1000 ýchaske berý úshin ómirdi qamtý júıelerimen jabdyqtaý jáne ınfraqurylymdy damytý úshin 6,5 mlrd teńge bıýdjet qarjysy kerek» - dedi Jer qatynastary basqarmasynyń basshysy Tóleýǵazy Núrkenov.
Bıyl qoldanystaǵy zańnamanyń jeke turǵyn úı qurylysyna jer telimderin berýge qatysty normalaryn jetildirý boıynsha usynystar ázirleý úshin arnaıy vedomstvoaralyq jumys toby quryldy. Atalǵan top qalada JTQ jer ýchaskelerin alýǵa turǵan azamattardyń kezegine taldaý júrgizdi.
Taldaý nátıjeleri boıynsha, kezekte turǵandardyń qatary ár túrli. Sondaı-aq, adamdardyń basym bóliginiń - 53 359 nemese 55,7% tabys ákeletin jer ýchaskeleri, páterleri men jeke turǵyn úıleri, basqa da jyljymaıtyn múlik nysandary buǵan deıin bolǵan nemese qazirgi ýaqytta bar.
Budan basqa, kezekte turǵandardyń 11,3% is júzinde respýblıkamyzdyń ózge óńirlerinde turady, sáıkesinshe, bul azamattar elorda aýmaǵynda JTQ júrgizý úshin jer telimin alýǵa muqtaj jandar sanatyna jatpaıdy.
Sonymen qatar, áleýmettik osal toptarǵa jatatyn tulǵalar kezekte turǵandardyń 1,6% quraıdy. Olardyń ótinishteri qanaǵattandyrylyp, TQJ úshin jer ýchaskesi berilgen jaǵdaıda bul sanattaǵy azamattar sáýlet-qala salý normalary men talaptaryna qatań sáıkestikte óz betterinshe qurylys júrgizýge qabiletsiz jáne jer telimin ıgere almaıdy.
Tájirıbe kórsetkendeı, Jeke turǵyn úı qurylysyn júrgizýge jer telimin alý úshin azamattardan kelip túsetin ótinishter sany jyl saıyn artyp keledi. Al jergilikti atqarýshy organdar suranysty qanaǵattandyra almaıtyndaryna qaramastan bul ótinishterdi tirkep, kezekke qoıýǵa mindetti. Qazirgi ýaqytta jerge suranys elordanyń damýynyń bas josparynyń jobalyq múmkindikterinen 6,3 ese artyq bolyp otyr.
Munymen qosa, jumys tobyna tartylǵan memlekettik organdar
JTQ júrgizýge jer telimderin berý máselesi boıynsha qoldanystaǵy zańnama normalaryn jetildirý boıynsha usynystar engizip, qarastyrdy, sheteldik táájirıbege taldaý jasady.
Mysaly, burynǵy odaqtas elder Belarýs pen Ózbekstanda jeke turǵyn úı qurylysyna aqysyz beriletin jer telimderi «Bir otbasyǵa - bir ýchaske» esebinen beriledi. Reseı Federatsııasynda óńirdiń erekshelikteri men eldi mekenderdiń naqty múmkindikterine qaraı jeke turǵyn úı qurylysyna aqysyz jer telimin berý normasy árqalaı. Atap aıtqanda, Máskeý qalasynda osy maqsatta tegin jer berý qarastyrylmaǵan, al federatsııanyń jeke aımaqtarynda mundaı norma qoldanylady.