Jer asty teńizderi planetany tolyǵymen basýy múmkin - feık

NUR-SULTAN. QazAqparat -Jelide ǵalamshardy topansý basýy múmkin degen teorııa taralýda. Jer astynda 1,5 shaqyrym tereńdikte qaınaǵan muhıttar tabylǵan, olardyń sýy Jer betine kóterilýi yqtımal. Bul múmkin emes, dep habarlaıdy stopfake.kz saıty.

Jer astyndaǵy sýdyń úlken massasy tabylǵany týraly aqparat Science ǵylymı jýrnalynda 2014 jyldyń maýsym aıynda jarııalandy. Alaıda, 1,5 shaqyrym tereńdikte qaınaǵan massa týraly aıtylǵan joq. Birinshiden, bul sý Jer mantııasynda, ıaǵnı 700-den 1400 shaqyrymǵa deıingi tereńdikte ornalasqan. Ekinshiden, jer asty teńizderi jer betindegi teńizderge uqsamaıdy. Jer astyndaǵy ylǵal erekshe mıneral – rıngvýdıtke jatady. Bul joǵary temperatýrada ǵana jáne Jer mantııasynyń qysymymen paıda bolatyn ashyq kók tústi jynys. Ol meteorıtterde de bolady.

Rıngvýdıttiń úlken jerasty jartastaryndaǵy sý keni seısmıkalyq tolqyndardy zertteıtin eki júz seısmograftyń kómegimen anyqtaldy. Ǵalymdar bul tolqyndardyń jyldamdyǵyn ártúrli tereńdikte ólsheı otyryp, olardyń keıbir jerlerde baıaýlaıtynyn baıqady. Tolqyndardyń ylǵaldy taý jynystarynan ótýine kóp ýaqyt qajet bolatyndyqtan, ǵalymdar olar baıaýlaıtyn jerde sýy bar rıngvýdıt ornalasqan degen qorytyndyǵa keldi.

ıAǵnı, jer asty teńizderi jaı kóterile almaıdy, óıtkeni Jer mantııasyndaǵy sý tasymaıdy, ol sırek kezdesetin mıneraldardyń birinde bolady. Demek, taralǵan teorııa ǵylymǵa qarsy jáne oǵan senýdiń qajeti joq.