«JEO-2» gazǵa aýysqan jaǵdaıda Almatynyń aýasy úsh esege tazarady

ALMATY. QazAqparat - 2025 jylǵa qaraı «Almaty Jylýelektr ortalyǵynyń» tabıǵı gazǵa ótýi aýaǵa taralatyn zııandy zattardyń mólsherin 48,4 myń tonnaǵa deıin azaıtady. Bul týraly qalalyq jasyl ekonomıka basqarmasynyń basshysy Natalıa Lıvınskaıa aıtty, dep habarlaıdy QazAqparat tilshisi.

«Karantın kezeńi aýanyń lastanýynyń kóp bóligi kólikten ekenin dáleldedi. Shekti ruqsat etilgen kontsentratsııa kórsetkishteri turaqty 5-ten 2-ge deıin tómendedi. Keıbir zattardyń ındeksi tómendedi, mysaly, fenol ındeksi 60 ese, azot dıoksıdi 2 ese azaıdy», - dedi Natalıa Lıvınskaıa.

Sonymen qatar, ol Almaty qalasynda atmosferalyq aýanyń jaǵdaıyn jaqsartý boıynsha 2020-2025 jyldarǵa arnalǵan keshendi sharalar jospary ázirlenip jatqanyn atap ótti.

«2022 jylǵa qaraı aýaǵa lastaýshy zattardyń shyǵaryndysyn 123 myń tonnadan 94 myń tonnaǵa deıin tómendetý josparda. Al 2025 jylǵa qaraı «JEO-2» gazǵa ótkenen keıin aýaǵa taralatyn zııandy zattardyń mólsheri 48,4 myń tonnaǵa deıin azaıady»,- dedi ol.