Jeńisten úmittimiz: amerıkalyq kókparshylar elordaǵa keldi
Nık Ýıllard bastaǵan amerıkalyqtar kóshpendiler oıyndaryna osymen úshinshi ret qatysady, biraq Qazaqstanǵa alǵash kelip otyr.
«Meni Ortalyq Azııa mádenıeti únemi qyzyqtyratyn, ásirese Qazaqstan men Qyrǵyzstannyń mádenıeti. Sondyqtan kóshpendiler oıyndaryna qatysý múmkindigin jibermedim. Bul men úshin úlken mártebe, oıynǵa uzaq daıyndalyp, taǵatsyzdana kúttim», - dedi Nık Ýıllard.
Sondaı-aq, sheteldik meıman aldaǵy oıyndardan ne kútetini týraly aıtty.
«Jeńisten úmittimiz. Jalpy ýaqytty sátti ótkizsek deımiz, qobaljýdamyz. Ár kóshpendiler oıyndaryna qatysqanda adamdarmen aralasyp, mádenıetpen tanysý umytylmas áser qaldyrady», - deıdi ol.
Kókpardan AQSh komandasynyń quramynda 7 oıynshy bar, keıbiri alǵash ret qatysqaly otyr, sonyń biri Ýıll Grant.
«Men buryn kókpar oınamaǵanmyn, bizdiń komandadaǵylardyń birazy alǵash oınaǵaly otyr. Biraq, oıyn erejesin bilemiz, biz úshin jeńil. Biz kókparǵa uqsas oıyndarǵa qatysqanbyz, sondyqtan atqa miný, jarysýdan habarymyz bar. Sol sııaqty jarys aldynda jylqylarmen jaqynyraq tanysyp, oıyn sátti ótedi dep úmittenemiz», - deıdi Ý. Grant.
Brendon Braıan 2016 jyly Qyrǵyzstanda ótken kóshpendiler oıyndaryna qatysqan. Onyń aıtýynsha, AQSh quramasy bıyl ótetin kóshpendiler oıyndaryna daıyndyqty maýsymda bastaǵan.
«Oıyn tartymdy ári qyzyqty ótedi dep oılaımyn. Komandamen oınaǵan únemi qyzyqty, sol sııaqty kókpar men kókbóri oıynynyń aıyrmashylyǵyn anyqtaýdy jalǵastyramyn. Sonymen qatar kóshpendi halyqtar jáne qazaq mádenıeti týraly kóbirek bilgim keledi», - dedi B. Braıan.
Sondaı-aq, amerıkalyq oıynshy jarysta jeńiske jetetinderine senimdi.
«Bizdiń kókpar komandasy AQSh-taǵy eń úzdik komandalardyń biri ekenine senimdimin. Bizdiń oıynshylar myqty, qatarymyzǵa jańa oıynshylar qosyldy, olar da des bermeıdi», - deıdi kóshpendiler oıyndarynyń qatysýshysy.
Aıta keteıik, keshe elimizde ótetin V dúnıejúzilik kóshpendiler oıyndaryna qatysýǵa amerıkalyq kovboılar komandasynyń kele jatqanyn habarlaǵan edik.
Esterińizge sala keteıik, V dúnıejúzilik kóshpendiler oıyndaryna sanaýly kún qaldy. Aıtýly sporttyq-mádenı shara Astanada 8-13 qyrkúıek aralyǵynda ótedi.
Dúnıejúzilik kóshpendiler oıyndarynda 89 memlekettiń sportshylary baq synaıdy.
Taıaýda Memleket basshysy Qasym-Jomart Toqaev V Dúnıejúzilik kóshpendiler oıyndaryna daıyndyq jóninde keńes ótkizdi.
Aıta ketsek, dúnıejúzilik kóshpendiler oıyndarynda tuńǵysh ret barlyq qurlyqtyń ókili baq synaıdy.