Jeńiske umtylǵan jeńil atlet: Otbasy Elızaveta Matveevadan úlken úmit kútedi

<p>ÓSKEMEN. KAZINFORM — Shyǵys Qazaqstan oblysynan Olımpıada oıyndaryna 7 sportshy barady. Sonyń biri — Elızaveta Matveeva. 23 jastaǵy jeńil atlet — Óskemenniń týmasy. Qazir Parıjdiń tórinde óner kórsetýge qyzý daıyndyq ústinde. Dostary men týystary jeńispen oralady dep jolyna úmitpen qarap otyr.</p>

Elızaveta 10 jasynan bastap jeńil atletıkamen aınalysady. Onyń erekshe qabiletin áý basta dene shynyqtyrý muǵalimi baıqaǵan.

Jas daryndy ózi baýlyp, jarystarǵa jastaıynan qosqan. 

Sol kúnderdiń belgisi retinde Elızavetanyń júldeleri bólmesinde samsap tur. Al, anasy Natalıa Kemerova qyzynyń árbir jetistigin esinen esh shyǵarǵan emes. 

Foto: vıdeodan kadr

— Bir aı ótken soń aq qyzym qalalyq, oblystyq jarystarda top jaryp júrdi. Ol alǵashqy medalin Glýbokoe aýylynda aldy. Bala kezindegi eń úlken jeńisi 2016 jyly bolǵan edi. Sol kezde ıAkýtııada Azııa balalary degen jarys ótken. Ol kezde qyzym 1,65 metrdi baǵyndyrdy, -deıdi Elızavetanyń anasy. 

Baıraqty básekede el namysyn qorǵaıtyn jeńil atlet jastarǵa da úlgi bolyp júr. Ásirese, artynan ergen inisi Elızavetaǵa qatty elikteıdi. 

— Ápkemniń jolyn qýǵym keledi. Ol sekildi halyqaralyq jarystarda boı kórsetsem deımin. Olımpıadalarda jeńiske jetip, álemdik arenaǵa shyqqym keledi. Ápkemdeı bolý — basty armanym, -dedi Dmıtrıı Matveev. 

Foto: vıdeodan kadr

Jas sportshy buǵan deıin Azııa chempıony atanǵan. Endigi meje — olımp shyńyn baǵyndyrý. Bul onyń sportshy retindegi maqsaty. Aıtpaqshy, byltyr ol bapker dárejesine ıe boldy.

Demek, tórt jyldyqtyń basty básekesine tájirıbesi tolysqan atlet sanatynda bara jatyr. Sondyqtan Lızadan júlde kútemiz deıdi jaqyndary. Qazir týystary sportshyny kún saıyn jigerlendirip júr. 

— Elızavetanyń jeńiske jetetinine senim mol. Ol Olga Rypakovadaı bolsam dep armandaıdy. Sol sekildi elge jeńispen oralsa eken deımiz. Qoldan kelgenshe qoldaýymyzdy aıamaımyz, — deıdi týystary. 

Ádette sportshylar úlken jarystardyń aldynda aqparat keńistiginen boıyn alystaý ustaıdy. Degenmen Elızaveta Matveeva agenttik tilshisimen arnaıy beınebaılanysqa shyǵyp, qazaqstandyqtarǵa Parıjden vıdeoúndeý joldady.

Foto: vıdeodan kadr

Sportshy óz beınejazbasynda: 

«Olımpıada oıyndaryn men kópten kúttim. Uzaq daıyndaldyq. Aldymda úlken maqsat tur. Basqa sportshylarymyzdyń da armany — jeńispen oralý. Bizdi olımpıada oıyndarynda qoldasańyzdar eken! Alǵa Qazaqstan!» — dep ystyq lebizin bildirdi. 

Aıta keteıik, 4 kúnnen keıin tórtkúl dúnıe kóz tigetin tórtjyldyq doda bastalady.

Qazaqstan quramasy atalǵan oıyndarǵa 92 joldama jeńip alǵan.

Sportshylarymyz baıraqty básekede 25 sport túrinen baq synaıdy. 

 

Altynbek Ámıt