Jeńistiń 70 jyldyǵyna oraı Astanada 7 mamyrda áskerı parad ótedi

ASTANA. QazAqparat - Jeńistiń 70 jyldyǵy aıasynda Astanada 7 mamyrda áskerı parad ótedi. Búgin «Nur Otan» partııasy janyndaǵy Mádenıet pen ónerdi damytý máseleleri jónindegi «Mıras» qoǵamdyq keńesiniń otyrysynda QR Qorǵanys mınıstrligi Tárbıe jáne ıdeologııalyq jumys departamentiniń bastyǵy, Qarýly Kúshter Bas shtaby bastyǵynyń orynbasary Muhamedjan Talasov osylaı málim etti. Eske salaıyq, otyrysta mınıstrlik ókili Uly Otan soǵysy Jeńisiniń 70 jyldyǵyn atap ótýge baǵyttalǵan is-sharalar týraly baıandaǵan bolatyn.

Vedomstvo ókiliniń aıtýynsha, Jeńistiń 70 jyldyq mereıtoıyn merekeleý aıasyndaǵy is-sharalar boıynsha eń birinshi kezekte soǵys ardagerleri men múgedekterin jáne osy sanatqa teńestirilgenderdi áleýmettik qoldaýǵa basa nazar aýdarylady. Sonymen qatar, ardagerlerdiń TMD aýmaǵynda atqarylatyn is-sharalarǵa qatysýyn qamtamasyz etý de kózdeledi.

«Mereıtoılyq sharalardyń negizgi ózegi Astanada 7-mamyrda áskerı parad ótkizý bolyp tabylady. Bul jolǵy áskerı sherýdiń ereksheligi - ol tarıhı jáne zamanaýı eki bólimnen turady. Sosyn paradqa Uly Otan soǵysynyń ardagerleri de qatysady. Budan bólek, áskerı sherýdiń sapalyq jáne sandyq mazmuny da, quramy da artady», - dedi Muhamedjan Talasov.

Onyń aıtýynsha, Astanadaǵy paradqa 5 myńnan astam áskerı qyzmetshi, 85 birlik avıatsııa tehnıkalary, 220 birlikti áskerı avtotehnıkalar qatystyrylmaq. «Mereıtoılyq sharany merekeleý aıasynda Qorǵanys mınıstrligi Qaraǵandy oblysyndaǵy Spassk polıgonynda tuńǵysh ret respýblıkalyq áskerı-patrıottyq jastar jıyny ótedi. Oǵan el basshylyǵy men óńirlerden delegatsııalar qatysady», - dedi M. Talasov.

Budan bólek, 7 mamyrda Astanada Jeńis kúni jáne Otan qorǵaýshylar kúnine arnalǵan arnaıy merekelik kontsert uıymdastyrylmaq. Jeńistiń 70 jyldyǵy mereıtoıynyń sharyqtaý sheginde Astana, Almaty qalalarynda 7-9 mamyr aralyǵynda mereıtoılyq otshashýlarmen kómkeriledi.