Jeńistiń 69 jyldyǵyna oraı Astana kóshelerine ardagerlerdiń sýretteri ilindi

ASTANA. QazAqparat - Elorda Jeńis kúnin atap ótýge erekshe daıyndyq ústinde. Erligi búgingi, erteńgi urpaqqa úlgi bolar batyrlarymyzǵa erekshe yqylas pen qurmet kórsetilýde. Mundaı ıgi bastamanyń biri - Uly Otan soǵysy ardagerleriniń qatysýymen ótken fotosessııa boldy.

Jeńistiń 69 jyldyǵy qarsańynda ardagerlerdiń sýretteri Astana kóshelerine ilindi. Onda batyrlardyń aty-jónderi, soǵysqan jerleri men ósıet-tilekteri jazylǵan. «Ol eń aldymen óskeleń urpaqqa beıbit ómir syılaǵan ardagerlerimizdi qurmetteý maqsatynda uıymdastyryldy. Aktsııa barysynda qala kóshelerinde alpystan asa ardagerlerdiń sýretteri ilinip, soǵysqan jerleri men maıdan dalasyndaǵy erlikteri jaıly qysqasha estelikter, jastarǵa izgi tilekteri kórsetilgen», - dedi ishki saıasat basqarmasy basshysynyń orynbasary Álnur Seıdýmanov. Aıta keteıik, mundaı ıgi shara elordada 2010 jyldan bastap qolǵa alynǵan. Qazir Astanada 200-den astam ardager turady. Olardyń árqaısysy zor qurmetke laıyq, dep habarlaıdy elorda ákimdiginiń resmı saıtynda.