Jeńistiń 65 jyldyǵy qarsańynda elimizdegi 300 myńǵa jýyq soǵys ardagerine «1941-1945 jyldardaǵy Uly Otan soǵysyndaǵy Jeńiske 65 jyl» merekelik medali tapsyrylady
Búgin QR Parlamenti Májilisiniń jalpy otyrysynda depýtattyq saýaldar boıynsha túsinik bergen Eńbek jáne halyqty áleýmettik qorǵaý mınıstri Gúlshara Ábdihalyqova osylaı málim etti, dep habarlaıdy QazAqparat.
Mınıstrdiń sózine qaraǵanda, Elbasynyń aǵymdaǵy Joldaýynda júktelgen soǵys ardagerlerin áleýmettik qoldaýǵa arnalǵan mindetterdi iske asyrý úshin Uly Otan soǵysyndaǵy Jeńistiń 65-jyldyǵyn merekeleý týraly Úkimettiń qaýlysy qabyldanǵan. «Osy tarıhı dataǵa arnalǵan is-sharalardy 2010 jyly jyl boıyna ótkizý kózdelýde. Qazirgi ýaqytta respýblıkamyzda 15 myńǵa jýyq soǵys ardagerleri men qatysýshylary, Uly Otan soǵysyndaǵy Jeńiske úles qosqan soǵysqa qatysýshylarǵa teńestirilgen 3 myńnan astam adam, 20 myńnan astam Uly Otan soǵysy ýaqytynda qaza tapqan áskerı qyzmetshilerdiń ata-analary men jubaılary, qaıtys bolǵan soǵys múgedekteriniń jáne solarǵa teńestirilgen múgedekterdiń jubaılary, 258 myń tyl eńbekkerleri turady», dedi G. Ábdihalyqova.
Onyń aıtýynsha, aǵymdaǵy jyly Keńes Odaǵynyń Batyrlaryna, úsh dárejeli Dańq ordeniniń ıegerlerine beriletin arnaýly memlekettik járdemaqynyń mólsheri 21 myń 195 teńgeden 183 myń 690 teńgege deıin artsa, Uly Otan soǵysynyń qatysýshylary bolyp tabylatyn Sotsıalıstik Eńbek Erlerine beriletin járdemaqy mólsheri 21 myń 195 teńgeden 98 myń 910 teńgege deıin kóbeıgen. Bunymen qosa, soǵys ardagerleriniń basqa sanattaryna aı saıyn 2 myń 826 teńgeden 21 myń 195 teńgege deıingi arnaýly memlekettik járdemaqy tólenedi.
«Jalpy, merekelik kúndi toılaýmen baılanysty, elimizde shamamen 300 myńǵa jýyq soǵys ardagerine «1941-1945 jyldardaǵy Uly Otan soǵysyndaǵy Jeńiske 65 jyl» merekelik medalin saltanatty jaǵdaıda tapsyra otyryp, qurmet kórsetý is-sharalary keńinen ótkizý josparlanýda», dedi mınıstr.