«Jeńiske taǵzym» aktsııa-marafony Astanada óz máresine jetti (FOTO)
«Joǵarǵy Bas qolbasshymyz, el Prezıdenti Nursultan Nazarbaevtyń bastamasymen barlyq garnızondarymyzda «Jeńis jalaýshasy» respýblıkalyq aktsııasy ótti. Bul jastardyń boıynda patrıottyq sezimdi, Otanǵa degen mahabbatty, ony qorǵaýǵa daıyndyqty tárbıeleıtin óte mańyzdy shara bolyp tabylady. Jeńis jalaýshasy osy ýaqyttan bastap ataqty batyrymyz, Halyq Qaharmany, armııa generaly Saǵadat Nurmaǵambetov atyndaǵy «Jas Ulan» mektebinde saqtalady», - dep atap ótti QR Qarýly kúshteriniń Qurlyqtaǵy áskerdiń Bas qolbasshysy, general-leıtenant Murat Maıkeev.
Ol qazaqstandyq jastardyń óz tarıhyn bilýi tıis ekenin atap ótti. «Otanymyz fashıstik basqynshylarmen kúresýge 12 motoatqyshtar dıvızııasy, 4 kavalerııa dıvızııasy, 7 brıgadasy men 50 polkin bóldi. Bul rette 1 mln 400 myń adam soǵysqa qatysqan. Sonyń ishinde 500 myń adam Keńes Odaǵynyń batyry joǵary ataǵyn aldy, tórteýi eki márte Batyr atandy. Ardagerlerimizdi Uly Otan soǵysyndaǵy Jeńistiń 70 jyldyǵymen quttyqtap, olarǵa densaýlyq tileımiz. Eń bastysy, jastarymyz olardyń arqasynda Otanǵa qyzmet etý úlgisin kórgenine óte qýanyshtymyz. Olardyń erligi, ataǵy óshpeıdi. Biz osy týraly umytpaǵanymyzdy maqtan etemiz», - dep túıindedi ol. «Jeńiske taǵzym» aktsııa-marafony 2014 jyldyń 30 jeltoqsanynda bastaldy. Uly Otan soǵysyndaǵy Jeńistiń 70 jyldyǵy men Dostastyq elderindegi Ardagerler jylynyń bastalýyn bildirgen saltanatty sharanyń qatysýshylaryn alǵashqy bolyp Astanadaǵy 36-shy desanttyq-shabýyldaý brıgadasynyń áskerı qyzmetkerleri qabyldady. Jeńis jalaýshasyn tapsyrý boıynsha jaýyngerlik estafetaǵa Qaraǵandy, Semeı, Qapshaǵaı, Aqtaý jáne Almatyǵa jaqyn ornalasqan áskerı bólimderdiń qyzmetkerleri qatysty.