JEŃІSKE DEIІN 19 KÚN: Berlınge deıin 60 shaqyrymdaı qaldy
Keńes aqparat bıýrosynyń «Sotsıalıstik Qazaqstan» gazetiniń 1945 jyldyń 21 sáýirindegi (senbi) №78-shi sanynda basylǵan «19 sáýirdegi urystar málimeti» osylaı bastalady.
Osy urystardyń nátıjesinde áskerlerimiz Drezden baǵytynda Neıse ózeninen ótip, FORST, MÝSKAÝ, VEISVASSER qalalaryn aldy. Al 2-shi Polsha armııasynyń áskerleri Rotenbýrg qalasyn aldy.
«Oder ózeni boıynda bizdiń áskerler Kıýstrın qalasynyń batys jaǵynda taban tireıtin bekinisti basyp alyp, ony keńeıtti» - delingen málimette.
Sonymen qatar, 1-shi Belarýs maıdanynyń (qolbasshysy, marshal G. Jýkov) 61-shi ekpindi armııasy Oder ózeniniń batys jaǵalaýynda urys júrgize otyryp, 1 shaqyrymǵa alǵa jyljydy. 47-shi, 3-shi ekpindi armııalar jáne 2-shi gvardııalyq tank armııasy Berlınge soltústik-shyǵystan shabýyldaýda. 5-shi ekpindi armııa Germanııa astanasyna «№ 1Reıhsshtrasse» dańǵylynyń boıymen jyljýda. Al 8-shi gvardııalyq armııa men 1-shi gvardııalyq tank armııasy Mıýnheberg qalasynyń mańynan jaý qorǵanysyn buzyp ótti. 69-shy armııa men 33-shi armııa Oder ózeniniń shyǵys jaǵalaýynda ornalasqan Frankfýrt qalasyn alyp, kúni boıy 3-4 shaqyrymǵa alǵa jyljydy.
Berlınniń ońtústik-shyǵysynan, Oder ózeni boıynan shabýylǵa kóshken 1-shi Ýkraın maıdanynyń (qolbasshysy, marshal I. Konev) 3-shi gvardııalyq tank armııasy (qolbasshysy, bronetank áskerleriniń marshaly Pavel Rybalko) 30-35 shaqyrymǵa jyljysa, 4-shi gvardııalyq tank armııasy keshke qaraı 50 shaqyrymdy basyp ótken. 3-shi jáne 5-shi gvardııalyq armııalar Kotbýs pen Shpremberg qalalarynyń mańynda óz qaptaldaryn keńeıtýge kúsh salýda.
Sonymen qatar áskerlerimiz Chehoslovakııa jerinde de sátti urystar júrgizip jatyr.
«19-shy sáýir barysynda Chehoslovakııa jerinde, GODONIN qalasynyń soltústik-shyǵys jáne soltústiginde 2-shi ÝKRAIN maıdanynyń áskerleri shabýyl urystaryn júrgize otyryp, KOZOIIDKI, LIDEROVITsE, ZARAZITsE, BZENETs, SKORONITsE, STAVЬEShITsE, NASEDLOVITsE qystaqtary men LIDEROVITsE, SVATOBORJITsE temir jol stansalaryn aldy.
VENA qalasynyń soltústik jaǵynda maıdan áskerleri Avstrııanyń BERNGARDSTALЬ, ALЬT LIHTENVART, VILЬFERSDORF. ZIBENIRTEN, ASPARN, LADENDORF qystaqtaryn jáne ALЬT LIHTENVART pen ASPARN temirjol stansalaryn aldy» - delingen málimette.
Basqa maıdandarda jergilikti mańyzǵa ıe urystar júrgizilýde jáne barlaýshylardyń izdeý jumystary jalǵasýda.
18 sáýir kúngi bolǵan urystarda nemisterdiń 96 tankisi men ózdiginen júretin zeńbiregi talqandaldy jáne joıyldy. Áýe urystarynda zenıttik artıllerııanyń kúshimen 115 jaý ushaǵy atyp túsirildi.
Sondaı-aq gazette Keńester odaǵynyń marshaly A. M. Vasılevskııdi «Jeńis» ordenimen marapattaý jáne avıatsııanyń bas marshaly A. A. Novıkovqa Keńes Odaǵynyń Batyry ataǵyn berý týraly KSRO Joǵarǵy Keńesi Tóralqasynyń19 sáýirdegi qaýlysy jarııalandy.