JEŃІSKE 70 JYL: Soǵysta habarsyz ketken aqmolalyq Musabek Qojahmetovtyń óleńmen jazylǵan haty (FOTO)

KÓKShETAÝ. QazAqparat - Uly Otan soǵysy kóptegen jerlesterimizdiń ómirin qıdy. Tipti, keıbiri maıdannan habarsyz ketti. Olardyń taǵdyry áli kúnge sheıin beımálim bolyp otyrǵan jaıy bar. Tek artynda qalǵan,eldegi týǵan-týysqandaryna joldaǵan bir japyraq hat-habarlary ǵana saqtalǵan. Sonyń biri, Zerendi aýdanyndaǵy Qarashilik aýylynan maıdanǵa attanyp, keıin habarsyz ketken Musabek Qojahmetovtyń ata-anasy men týǵan baýyrlaryna, el-jurtyna óziniń amandyǵyn aıtyp, sálemin joldaǵan óleń-haty der edik. Bul hatty Zerendi aýdany Krasılovka aýylynnyń turǵyny folklortanýshy tereń bilgiri jáne daýysy ádemi, oryndaý sheberligi joǵary ánshi Ǵazıza Tileýovadan (1935-1989jj.ómir súrgen) jazylyp alynǵan eken. Keıin 1995 jyly Almatyda turatyn jazýshy Maǵıra Qojahmetova bul ánniń avtory Musabek Qojahmetovtyń Stalıngrad shaıqasynda qaza tapqan óziniń aǵasy ekenin aıtqan. Bul óleń «Órteńge ósken qyzǵaldaqtar...» atty Uly Otan soǵysy kezinde shyǵarylǵan hat-óleńder jınaǵynda jaryq kórgen.

Óleń joldaryn «QazAqparat» oqyrmanyna usynamyz.

Men búgin qalam aldym qapalanyp, Ómirden beınet kórip júrmin talyp. Tústim ǵoı jastyq shaqta mundaı kúıge, Kórermiz qyzyq kúndi qaıda baryp.

Kim ǵaryp osy kúnde - halyq ǵaryp, Kún keshken jylap-syqtap, aryp-talyp. Shyqqan soń uzaq-uzaq sálem jazam, Arttaǵy el jurtymdy eske alyp.

Birinshi álpeshtegen áke-sheshem, Bul kúnde júrsizder me aman-esen? Jazaıyn týǵan jerge jalpy salem, Óleńge bolmasaq ta júırik sheshen.

Hat jazam Balapııa qaryndasqa, Eı, Alla, ólim berme bizdeı jasqa. Atadan altaý bolyp týsaq taǵy, Jalǵyzdyq keledi eken shirkin basqa.

Baýyrym hat jazaıyn, Ǵazız inim, Kózińnen aınalaıyn, altyn kúnim Áskerge men keterde kóp jylap eń, Bul kúnde qandaı eken seniń túriń?

Hat jazam týǵan aǵa Dáýletbekke, Dám aıdap óz elimnen shyqtym shetke. Aldymda ata-ana renish kórse, Kóńilimdi qaldyrǵanyń qalyń dertke.

Anadan birge týǵan apataıym, Kún sanap oı túsedi ósken saıyn. Temirdeı tártibi bar oıyndamyz. Osylaı suraǵanǵa meniń jaıym.

Bul mindet Otan úshin amalym joq, Eldegi erkin ósken zamanym joq. Aıtysqan jaqsy-jaman qurbylarym, Bul kúnde ishterinde jamanyń joq.