Jeńis Nurǵalıev: Veterınarııa máselesi bitpeıtin jyrǵa aınaldy

ASTANA. QazAqparat - Mal sharýashylyǵyndaǵy veterınarııa máselelerinde zańnamalyq turǵyda túıtkilder bar. Bul týraly Parlament Senatynda agroónerkásip kesheni talqylanǵan dóńgelek ústelde Senattyń agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń tóraǵasy Jeńis Nurǵalıev málim etti, dep habarlaıdy «QazAqparat» HAA tilshisi.

«Mal sharýashylyǵy men veterınarııa... Memleket basshysy júktegen mindetke sáıkes, aýyl sharýashylyǵynyń basym baǵyttarynyń biri - etti mal sharýashylyǵy men qoı sharýashylyǵy bolýy kerek. Osyǵan baılanysty, et eksportyn arttyrý baǵdarlamasyn qaıta qolǵa alý mańyzdy dep bilemiz. Mal sharýashylyǵy týraly sóz sóılegen kezde veterınarııany aınalyp ótýge bolmaıdy. Sebebi, mal sharýashylyǵyn veterınarııamen qamtamasyz etýmen ǵana aldaǵy maqsattardy oryndaýǵa bolady», - deıdi komıtet tóraǵasy.

Jeńis Nurǵalıevtyń aıtýynsha, veterınarııaǵa kelgende zańnamalyq turǵyda suraqtar bar.

«Ókinishke qaraı, veterınarııa salasyndaǵy máseleler bitpeıtin jyrǵa aınalyp bara jatyr. Atap aıtqanda, zańnamalyq turǵyda... Veterınarııa týraly qazirgi qoldanystaǵy zańda jergilikti atqarýshy organdar karantındik aýrýlar anyqtalǵan jaǵdaıda shuǵyl sheshim qabyldaıtyndaı normalar qarastyrylmaǵan», - deıdi ol.

Onyń aıtýynsha, buǵan deıin veterınarııalyq máseleler týraly jıyn ótip, birshama keńes berilgen.

«Osyǵan baılanysty veterınarlyq qaýipsizdik agroónerkásiptik keshendegi ótkir máselelerdiń biri bolyp otyr», - dep túıdi Jeńis Nurǵalıev.