Jeńis kúnine arnalǵan merekelik lenta halyqtyq aktsııaǵa aınalýda

ASTANA. QazAqparat - Qazaqstanda Jeńis kúnine arnalǵan ulttyq naqyshtaǵy merekelik lenta halyqtyq aktsııaǵa aınalyp keledi. Mereke kúni qarsańynda atalǵan «Jeńis lentasy» aktsııasyn qoldaýshylar sany arta túsýde, dep habarlaıdy QazAqparat. 

Aıta keterligi, Astanada Jeńis kúni qarsańynda el ıgiligi men bolashaq urpaqtyń bostandyǵy úshin óz ómirin qıǵan jandardy, soǵys jyldaryn jáne olardyń erlikterin este saqtap qalýǵa baǵyttalǵan «Jeńis lentasy» jyl saıynǵy sharasy uıymdastyrylady. Bıyl patrıottyq aktsııa aıasynda lentalar 6-9 mamyrda saǵat 10:30-dan 18:30-ǵa deıin qalanyń birneshe núktesinde, sonyń ishinde «Báıterek» monýmentiniń, «Han Shatyr», «Mega Silk way» saýda oıyn-saýyq ortalyqtarynyń mańynda, qalalyq alańda jáne Stýdentter saıabaǵynda taratylady.

Toqtala ketetin jaıt, Qazaqstanda Jeńis kúnin merekeleýdiń sımvolyn jasaý maqsatynda jańa patrıottyq lenta jasaldy. 2015 jyly Jeńis lentasy resmı jańartylyp, jańa dızaında tanystyrylǵan bolatyn. 

 

Jeńis lentasy - aspan kók tústi jáne ortasynda altyn tústi ulttyq órnek elementteri paıdalanyp jasalǵan jibek mataly lenta. 

Qazaqstandyq «Jeńis lentasy» beıbitshilikti súıetin elimizdiń ashyq aspanyn, sum soǵys jyldaryndaǵy ata-babalarymyzdyń eren erligin bildiredi.