Jeńis kúnine arnalǵan marsh Almatyda onlaın formatta ótedi

ALMATY. QazAqparat – Bıyl «Er esimi – el esinde» aktsııasy https://batyrlargatagzym.el.kz platformasynda onlaın ótedi. Bul týraly Óńirlik kommýnıkatsııalar qyzmetindegi brıfıngide Almaty qalalyq ardagerler keńesiniń ókilderi málim etti, dep habarlaıdy QazAqparat tilshisi.

«Onlaın-aktsııany ótkizýde tájirıbemiz jetkilikti. 2020-2021 jyldary karantındik shekteý kezinde osyndaı aktsııa onlaın formatta ótken edi. Aktsııany dástúrli formatta ótkizý únemi qoǵamdyq qaýipsizdiktiń belgili bir keleńsiz jaǵdaılaryna alyp keletini jasyryn emes. Sonymen qatar, qalanyń ortalyq kósheleriniń birindegi qozǵalystyń jabylýy avtokólik ıeleri men jaqyn mańdaǵy úı turǵyndary úshin qolaısyzdyqtar týǵyzady», - dedi «Aýǵanstan ardagerler odaǵy» qoǵamdyq birlestiginiń tóraǵasy, Almaty qalalyq Ardagerler keńesi tóraǵasynyń orynbasary Murat Abdýshýkýrov.

Aıtýynsha, onlaın-aktsııalarǵa qala turǵyndary belsendi qatysady. Almaly aýdandyq Ardagerler keńesiniń tóraǵasy Bataı Qabylov «Ardagerlerge taǵzym» qaıyrymdylyq aktsııasy aıasynda úıinde qyzmet kórsetiletin jáne medıtsınalyq-áleýmettik mekemelerde turatyn soǵys ardagerleri men múgedekterin, tyl eńbekkerlerin quttyqtaıtyndaryn jetkizdi. Sonymen qatar, soǵys ardagerlerin jáne olarǵa teńestirilgen sanattaǵy adamdardy, onyń ishinde úıde keshendi áleýmettik-medıtsınalyq tekserý aıy jalǵasýda. Spıkerler Almaty turǵyndary men qonaqtaryn arandatýshylyqqa berilmeýge, qoǵamdaǵy kelisim men ózara syılastyqty saqtaýǵa shaqyrdy.

«9 mamyr – bizdiń ortaq merekemiz. Bul kúnderi rızashylyq bildirip, soǵys ardagerlerin qurmettep, birlikti kórsetýimiz kerek»,- dedi Bataı Qabylov.