Jeńis kúninde soǵys ardagerlerine 600 myń teńgeden beriledi – ShQO

ÓSKEMEN. QazAqparat – Shyǵys Qazaqstan oblysynda Jeńis kúninde 134 soǵys ardagerine 600 myń teńgeden berilmek, dep habarlaıdy QazAqparat.

Bul jaıly búgin oblys ákimdiginde ótken jıyn barysynda aıtyldy. Sondaı-aq tyl eńbekkerleri men olarǵa teńestirilgen adamdar 100 myń teńgeden alady.

Aımaq basshysy Danıal Ahmetov osydan bólek aýdan ákimdikteri qosymsha kómek kórsetetinin málim etti.

«Bul - bizdiń maıdan shebine attanyp, surapyl soǵysqa qatysqan batyrlarymyzdyń aldyndaǵy boryshymyz. 9 mamyr - halqymyzdy biriktiretin mereke. Bir aıdyń ishinde óskeleń urpaqqa qazaqstandyqtardyń soǵys kezindegi eren erligi týraly baıandaıtyn arnaıy mektep baǵdarlamasyn ázirleý kerek. Ony jalpy bilim berý baǵdarlamasyna qosymsha retinde engizemiz», - dedi ákim.

Jalpy oblys boıynsha Jeńis kúnine oraı 7-9 mamyr aralyǵynda 200 myń adamnyń qatysýymen 340-tan astam shara ótkizý josparlanǵan.