Jeńis kúni - jastardy patrıottyq rýhta tárbıeleýdiń jarqyn úlgisi - K. Serikbaev

ALMATY. QazAqparat- Polkovnık Kım Serikbaev. Kım aǵany tanymaıtyn adam kemde-kem shyǵar. Áskerı ǵylymdar salasynda dıssertatsııa qorǵaǵan tuńǵysh qazaq. 1992 jyly Joǵarǵy Keńeste Qazaqstan Respýblıkasynyń «Qorǵanysy jáne Qarýly Kúshteri týraly» tuńǵysh zań jobasyn qorǵaǵan áskerı ǵalym. Ózi general bolmasa da, talaı generaldy tárbıelegen, bıyl seksenniń seńgirine shyqqan Kım Serikbaıuly, Uly Jeńis kúni qarsańynda QazAqparat tilshisine bergen qysqasha suhbatynda Qazaqstannyń Qarýly Kúshteriniń ótkeni men búginine jáne Uly Jeńistiń mán-maǵynasyna toqtalǵan edi.

- Kım Serikbaıuly, sizdiń júregińizde Otan qorǵaýshylar kúni qandaı oryn alady?

- Egemendi el bolǵannan keıin, budan 22 jyl buryn 7 mamyrda Qazaqstannyń Qarýly Kúshterin qurý týraly Elbasymyzdyń Jarlyǵy shyqty. Bul kún táýelsiz Qazaqstannyń Qarýly Kúshteriniń qurylǵan kúni! Bul kúndi men qazaq tarıhyndaǵy erekshe kún dep sanaımyn!

- Kım Serikbaıuly, Siz Qazaqstannyń Qarýly kúshterin qurýdyń bastaýynda turdyńyz. Sol jyldary qandaı qyzmetter atqardyńyz?

- 1992-1993 jyldary men Qazaqstan Respýblıkasynyń Prezıdenti apparatynda jańadan qurylǵan qorǵanys bóliminiń basshysy bolyp qyzmet atqardym. Prezıdenttiń, Úkimet basshysynyń tapsyrmalarymen Qazaqstannyń Qarýly Kúshterin qurýǵa qajetti áskerı zańdardy 3-4 aıdyń ishinde daıyndaý kerek boldy. Biz bul mindetterdi abyroımen atqardyq. 1992 jyly 21-22 jeltoqsanda «Qazaqstan Respýblıkasynyń Qorǵanysy jáne Qarýly Kúshteri» týraly zań jobasyn Joǵarǵy Keńeste qorǵap shyqtyq. Joǵarǵy Keńes ol zańdy qabyldady. Bul zań Qazaqstannyń Qarýly Kúshterin qurýdyń «irgetasy» boldy. Men, Qarýly Kúshterimiz memleketimizdiń áskerı qaýipsizdigin qamtamasyz etedi degen senimdemin!

- Kım Serikbaıuly, búgingi óskeleń urpaq arasynda áskerı-patrıottyq tárbıe berý jumystaryna qandaı baǵa berer edińiz?

- Shynymdy aıtaıyn, jastarǵa áskerı-patrıottyq tárbıe berý jumystary budan 20-25 jyl buryn joǵary deńgeıde bolatyn. Qazir bul jumystar birshama bosańsyp ketti.

- Ne sebepten?

- Óıtkeni orta jáne joǵary oqý oryndarynda áskerı-patrıottyq tárbıe berý jumystary áli de bolsa óz deńgeıinde emes. Bul jerde Bilim jáne ǵylym mınıstrligi Qorǵanys mınıstrligimen birlese otyryp jumys atqarýlary tıis. Jastardyń patrıottyq rýhyn oıatý úshin jańa jobalardy ázirlep, júzege asyrǵan jón. Jastar erteń elin qorǵaýǵa daıyn azamat bolyp qalyptasýlary úshin áskerı-patrıottyq tárbıeniń mańyzy zor.

- Kım Serikbaıuly, elimiz Uly Jeńistiń 69 jyldyǵyn atap ótedi! Osy mereke jaıynda pikirińizdi bilgimiz keledi.

- Men mynany aıtqym keledi. Biz bul merekeniń mańyzyn, mánin qashanda aıtyp, túsindirýmen kelemiz. Biraq, shyndyǵyn aıtý kerek, sońǵy kezderi «Bul merekeniń keregi qansha?», «Ony atap ótip ne kerek?», «Bul Stalın men Gıtlerdiń soǵysy, qazaqqa esh keregi joq soǵys» - deıtin azamattar shyǵyp jatyr. Bul tarıhqa, otan qorǵaý máselesine jasalǵan qııanat! Sol úshin, jastar arasynda osy Jeńistiń mán-maǵynasy jóninde túsindirý jumystaryn júrgizý kerek. Bul Jeńis - jastardy patrıottyq rýhta tárbıeleýdiń jarqyn úlgisi! Jastarymyz Uly Otan soǵysynda jaýǵa atoı salǵan batyrlarymyzǵa qarap, solardyń erlik isterine qarap boı túzeıdi.

- Osy uly mereke qarsańynda otandastaryńyza aıtar tilegińizdi bildirseńiz!

- Biz - beıbit halyqpyz! Biz - beıbitshilikti qasterleıtin halyqpyz! Keshegi Uly Otan soǵysynda aǵa-apalarymyz qan maıdanda, tylda erliktiń teńdessiz úlgilerin kórsetti. Adamzatty fashızmnen qutqardy! Búgingi sapta turǵan sarbazdarǵa: sol atalaryńa uqsańdar, elimizdiń myqty qorǵaýshylary bolyńdar degen tilegimdi aıtamyn. Al ardager aǵa-apalarymyzdy osy uly merekemen quttyqtaımyn! Olarǵa zor densaýlyq tileımin! Balalarynyń, shóbereleriniń aldynda ómir súre bersin!

- Áńgimeńizge kóp-kóp rahmet!