Jeńis kúni qarsańynda ardagerlerge aqshalaı kómek qandaı mólsherde bolady
«Jergilikti atqarýshy organdar jyl saıyn Jeńis kúni qarsańynda Ekinshi dúnıejúzilik soǵys ardagerlerine, olarǵa teńistirilgen adamdarǵa jáne tyl eńbekkerlerine birjolǵy aqshalaı kómek kórsetedi. Ardagerlermen kezdesýler barysynda olar ár óńirde tólemder ártúrli ekenin aıtyp otyr. Sebebi onyń mólsherin jergilikti organdar aıqyndaıdy. Bıyl Jeńis kúnine oraı beriletin tólemder qandaı mólsherde bolady? Bizdiń oıymyzsha, mundaı tólemderdiń biryńǵaı mólsherin aıqyndaý oryndy», - dedi depýtat Balaıym Kesebaeva.
Óz kezeginde QR Eńbek jáne halyqty áleýmettik qorǵaý mınıstri Birjan Nurymbetov Úkimette Jeńis kúnine beriletin tólemder Qazaqstan boıynsha birkelki bolǵanyn nazarǵa alyp otyrǵanyn jetkizdi.
«Osyǵan qatysty Úkimettiń basshylyǵymen tıisti usynys ákimdikterge berilgen. Bul jerde biz tómengi mólsherin belgiledik. Ekinshi dúnıejúzilik soǵystyń qatysýshylaryna, múgedekterine eń tómengi soma 300 myń teńgeden kem emes... Biraq óńirlerde eger múmkindikteri bolsa, keıbir oblystar odan da joǵary beremiz dep josparlaýda», - dedi mınıstr.
Parlament Májilisiniń tóraǵasy Nurlan Nyǵmatýlınniń atap ótýinshe, atalǵan tólemderdiń biryńǵaı mólsheri bolǵany durys.
«Árıne, tólem somasy az bolmaýy kerek. Jeńiske 75 jyl tolyp otyr. Sondyqtan depýtat aıtqandaı, mundaı tólemderdiń biryńǵaı mólsherin aıqyndaý kerek. Osyny Úkimettiń usynysy boıynsha qarap shyǵyńyz, alda ýaqyt bar», - dedi N. Nyǵmatýlın Eńbek mınıstrine qarata aıtqan sózinde.