Jeńis kúni: Almatyda negizgi is-sharalar 28 gvardııashyl-panfılovshylar saıabaǵynda ótedi

ALMATY. QazAqparat – Almatyda Jeńis kúnine oraı, 28 gvardııashyl-panfılovshylar saıabaǵynda ardagerler jáne qala belsendileriniń qatysýymen gúl shoqtaryn qoıý rásimi jáne áskerı qyzmetshilerdiń saltanatty sherýi ótedi. Qazaqstan estrada juldyzdarynyń, Almaty qalasy ákimi estradalyq-sımfonııalyq orkestriniń merekelik kontserti uıymdastyrylady, dep habarlaıdy QazAqparat tilshisi.

Almaty qalalyq ardagerler keńesi tóraǵasynyń orynbasary Serik Qurmanǵalıevtiń aıtýynsha, taqyryptyq bezendirý aıasynda kishi arhıtektýralyq formalar, ardagerlerge arnalǵan shatyrlar, dalalyq as úı, batyrlardyń performanstary jáne t.b. qamtamasyz etiledi.

«Biz qala ákimdigimen birlesip 41 tarmaqtan turatyn qalalyq is-sharalar josparyn ázirledik. Soǵys ardagerlerin jáne olardyń otbasy múshelerin qala basshylyǵynyń jeke baryp quttyqtaýy uıymdastyrylady. Bıyl «Jeńis» lentasynyń 50 myń danasy daıyndalady. Olardy belsendi taratý úshin eriktiler tartylady. Aýdan ákimderimen birlesip qala aýmaǵyndaǵy memorıaldyq taqtalarǵa, monýmentterge, soǵys batyrlarynyń eskertkishterine, atap aıtqanda B. Momyshuly monýmenti, T. Bıgeldınov, S. Nurmaǵambetov, R. Qoshqarbaev memorıaldyq taqtalary, Á. Moldaǵulova men M. Mámetova eskertkishteri, S. Lýganskııdiń bıýsti, «Máńgilik Otan uldaryna estelik», «Otan úshin shaıqasta qaza tapqan batyrlarǵa máńgilik dańq» memorıaldaryna gúl sebetteri qoıylady», - dedi Almaty qalalyq ardagerler keńesi tóraǵasynyń orynbasary Serik Qurmanǵalıev óńirlik kommýnıkatsııalar qyzmetinde ótken brıfıngte.

Onyń málimetinshe, 9 mamyr kúni:

saǵat 10:00-den 14:30-ǵa deıin Voznesenskıı soborynyń aldyndaǵy alańda (28 gvardııashyl-panfılovshylar saıabaǵy) kontserttik baǵdarlama ótedi;

saǵat 11:00-den 16:30-ǵa deıin Arbatta (Jibek joly men Panfılov kósheleriniń qıylysy) jáne Sh. Ýálıhanov atyndaǵy skverde qala turǵyndary men qonaqtary úshin kontsertter qoıylady.

Sol kúni basqa aýdandarda da túrli merekelik is-sharalar ótedi (Alataý aýdanynda 7 mamyrda).

Budan basqa, zamanaýı qazaqstandyq áskerı tehnıka men qarý-jaraqtyń kórmesi uıymdastyrylady. Turǵyndarǵa merekelik kóńil kúı syılaý úshin bir ýaqytta birneshe jerde mádenı-buqaralyq is-sharalar ótedi.

Buǵan deıin Almatyda 9 mamyrǵa oraı birjolǵy áleýmettik tólem kimderge beriletini habarlandy.

Al, «Er esimi – el esinde» aktsııasy bıyl onlaın ótedi.